नागपूर : भारतीय जनता पक्षाच्या अल्पसंख्याक विभागाच्या पदाधिकारी सना खान यांचे ऑगस्ट महिन्यात अपहरण करून खून करण्यात आला. याप्रकरणी मानकापूर पोलिसांनी अपहरण व खुनाचा गुन्हा दाखल करून मारेकरी व त्याच्या साथीदारांना अटकही केली. परंतु, अद्यापही सना खान यांचा मृतदेह शोधून काढण्यात हायटेक पोलिसांना यश आलेले नाही. कोणत्याही गुन्ह्याचा छडा लावण्याचा दावा करणारे पोलिस या प्रकरणात मात्र मृतदेह शोधू न शकल्याने आश्चर्य व्यक्त करण्यात येत आहे.
सना हत्याकांड प्रकरणात पोलिसांनी सूत्रधार व कुख्यात गुंड अमित उर्फ पप्पू शाहू, त्याचा मित्र राजेश सिंग, धमेंद्र यादव, धमेंद्रचे वडील रब्बू चाचा ऊर्फ रविशंकर यादव व कमलेश पटेल या पाच जणांना अटक केली. सध्या पाचही जण कारागृहात आहेत.
पप्पू शाहू व सना यांनी भागीदारीत हॉटेलचा व्यवसाय सुरू केला आहे. पप्पू याने नफ्याचा वाटा देणे सना यांना बंद केले. जुलै महिन्यात पप्पूने सना यांना ठार मारण्याची धमकी दिली. १ ऑगस्टला सना या जबलपूरला गेल्या. दोन दिवसांनी संपर्क न झाल्याने त्यांच्या आईने मानकापूर पोलिसांत सना या बेपत्ता असल्याची तक्रार दिली. पोलिसांचे दोन पथक जबलपूरला गेले. पोलिसांनी सना व पप्पूचा शोध घेतला. मात्र दोघेही आढळून आले नाहीत.दरम्यान, पोलिसांनी अपहरणाचा गुन्हा दाखल करून पप्पूला अटक केली. चौकशीदरम्यान सना यांचा खून करून मृतदेह नदीत फेकल्याचे त्याने सांगितले. त्यानंतर पोलिसांनी खुनाचा गुन्हा दाखल केला. मृतदेहाची विल्हेवाट लावण्यात त्याला मदत करणाऱ्यांनाही पोलिसांनी अटक केली. नोव्हेंबर महिन्यात पोलिसांनी न्यायालयात आरोपपत्र दाखल केले. घटनेला चार महिन्यांचा कालावधी लोटला असतानाही पोलिसांना सना खान यांचा मृतदेह आढळून आलेला नाही.
Users Today : 19