परवानगी नसतानाही तोतया डॉक्टरची ॲलोपॅथी प्रॅक्टीस, मुळव्याधीचं ऑपरेशनही केलं, अकोल्यातील घटना

प्रोबीर संतोष सरकार हा गेल्या १५ वर्षापासून बोरगाव मंजू येथे वैद्यकीय व्यवसाय करतो आहे. जिल्ह्यातील धोतर्डी येथील दोघांना मूळव्याधीचा त्रास होता. सरकारने ऑपरेशन करून त्यांना पूर्णपणे बरे करतो असे सांगून त्यानं दोघांचेही मुळव्याधीचे ऑपरेशन केले. त्यापोटी त्याने प्रत्येकी ३५ हजार रुपये घेतले होते. परंतू दोघांनाही ऑपरेशन करूनही काहीही फायदा झाला नाही त्यामुळे त्यांनी डॉक्टरकडे जात उपचाराची रक्कम परत मागितली. यावेळी त्याने रक्कम देण्यास नकार दिला. दोन्ही रुग्णांना डॉक्टरवर संशय आल्याने त्यांनी या प्रकरणाची तक्रार तालुका वैद्यकीय अधिकाऱ्याकडे केली. त्यानंतर या तक्रारीवरून चौकशी सुरू झाली.असं आले प्रकरण उघडकीस-

तालुका वैद्यकीय अधिकारी यांनी वैद्यकीय अधिकारी डॉ. रूपाली पवार यांच्याकड़ं चौकशी सोपवली. डॉ. पवारांनी तक्रारदारांची विचारपूस केली असता डॉक्टरनं प्रत्येकाकडून ३५ हजार रुपये घेऊन मूळव्याध बरे करतो म्हणून ऑपरेशन केले असल्याचे समजले. त्यानंतर वैद्यकीय अधिकारी डॉ. रूपाली पवार यांनी डॉ. एस. एस. बॅनर्जी याच्या फिजिशियन दवाखान्यात पाहिले, नॅचरोपॅथीक व योगाचे तो प्रमाणपत्र असतांना अॅलोपॅथीची प्रॅक्टीस करताना दिसून आला. त्याच्याकडे बॉम्बे नर्सिंग अॅक्ट अंतर्गत नोंदणी प्रमाणपत्रही नाही. त्यानंतर अॅलोपॅथीची परवानगी नसताना प्रॅक्टीस करता येत नाही, असा सविस्तर चौकशी अहवाल जिल्हा परिषदचे जिल्हा आरोग्य अधिकारी यांना पाठवला.

त्यांच्या आदेशावरून या तोतया डॉ. एस.एस. बॅनर्जी उर्फ प्रोबीर संतोष सरकार याच्याविरूद्ध बोरगाव मंजू पोलिसांत डॉ. रूपाली पवार यांनी तक्रार नोंदवली. त्यानुसार पोलिसांनी कलम ३३ महाराष्ट्र वैद्यकिय व्यवसायी अधिनियम १९६१ नुसार गुन्हा दाखल करण्यात आला आहे. दरम्यान गुन्हा दाखल झाल्यापासून तोतया डॉक्टर बॅनर्जी हा फरार आहे, अशी माहिती बोरगाव मंजू पोलीस स्टेशनचे पोलीस उपनिरीक्षक रत्नदीप पळसपगार यांनी दिली आहे.