ललित पाटीलसह चौघांचा पाय आणखी खोलात,नाशिक न्यायालयाचा मोठा निर्णय, पोलीस ड्रग्ज प्रकरणाचा छडा लावणार?

नाशिक : एमडी ड्रग्ज प्रकरणात मुख्य आरोपी असलेल्या ललित पाटीलचा ताबा काल नाशिक पोलिसांनी घेतला. आज नाशिक येथील जिल्हा व सत्र न्यायालयात पाटील याला हजर करण्यात आले होते. यावेळी ललित पाटीलसह चौघांना न्यायालयाने १० दिवसांची पोलीस कोठडी सुनावली ललित पाटीलसह रोहित चौधरी, झिशान शेख, हरीश पंत याच्या चौकशीसाठी सरकारी वकिलांनी पोलीस कोठडी वाढवून मागितली होती. न्यायालयात हजर करण्यापूर्वी ललित पाटीलला नाशिकच्या अंमली पदार्थ विरोधी पथकाच्या कार्यालयात आणलं होतं. इथे त्याची चौकशी करण्यात आली.ललित पाटीलला १८ डिसेंबर पर्यंत पोलीस कोठडी देण्यात आली असून पुणे आणि मुंबई येथे जे कारण देण्यात आले होते तेच नाशिक येथे देण्यात आले. त्यामुळे पोलीस कोठडी देऊ नये, असा युक्तिवाद ललित पाटील यांच्या वकिलांकडून न्यायालयात करण्यात आला होता. दरम्यान, एकाच कारणाने मुंबई, पुणे आणि त्यानंतर नाशिक येथे पोलीस कोठडी देण्यात आल्याने त्याला ललित पाटील सह त्याच्या साथीदारांच्या वकिलांनी आक्षेप घेतला होता. पण, ललित पाटील याला पोलीस कोठडी देण्यात आली, अशी माहिती ललित पाटील सह इतर आरोपींचे वकील जावेद शेख यांनी दिली.एका आरोपीच्या न्यायालयीन कोठडी साठी अर्ज सादर करण्यात आला होता ,तर चार जणांच्या पोलीस कस्टडी साठी अर्ज देखील करण्यात आला होता. त्यानुसार कोर्टाने दहा दिवसांची पोलीस कोठडी दिली आहे. एमडी ड्रग्ज एक्सपर्ट कोण आहे, फॉर्म्युला कुठून आणला यासाठी ही पोलीस कस्टडी मागण्यात आल्याची माहिती सरकारी वकील पंकज चंद्रकोर यांनी दिली आहे.दरम्यान ललित पाटील सह चौघांना न्यायालयाने १८ डिसेंबर पर्यंतची पोलीस कोठडी दिली आहे. त्यामुळे कोठडीत असताना तपासात काय निष्पन्न होतं हे देखील पाहणं आता महत्त्वाचं ठरेल.एमडी ड्रग्ज प्रकरणातील मुख्य सूत्रधार ललित पाटील याच्यासह चौघांचा ताबा काल नाशिक शहर पोलिसांनी घेतला. ऑर्थररोड कारागृहातून पाटीलसह चार जणांना ताब्यात घेतले. तर, याच प्रकरणात पोलिसांच्या पथकाने दोन दिवसांपूर्वी शिवाजी शिंदे, भूषण पानपाटील, अभिजित बलकवडे यांना अटक केली असून संशयित दि. १३ पर्यंत पोलीस कोठडी सुनावण्यात आली आहे.