पुणे : गुलटेकडी येथील छत्रपती शिवाजी मार्केट यार्डात रविवारी (१० डिसेंबर) फळभाज्यांची आवक वाढल्याने कोबी आाणि फ्लॉवरच्या दरांत घट झाली. मात्र, भेंडी, गवार, शिमला मिरची आणि घेवड्याच्या मागणीत वाढ झाल्याने त्यांच्या दरांतही वाढ झाली. अन्य सर्वच फळभाज्यांचे दर स्थिर असल्याची माहिती व्यापाऱ्यांनी दिली.
रविवारी राज्याच्या विविध भागातून आणि परराज्यांतून सुमारे १०० ते ११० भाजीपाल्याची आवक झाली. गुजरात, कर्नाटक येथून हिरवी मिरची सुमारे १० ते १२ टेम्पो, कर्नाटक, गुजरात येथून कोबी चार ते पाच टेम्पो, आंध्र प्रदेश, तमिळनाडू येथून दोन ते तीन टेम्पो शेवगा, राजस्थानातून ११ ते १२ टेम्पो गाजर, कर्नाटक येथून घेवडा चार ते पाच टेम्पो, कर्नाटक येथून एक टेम्पो भुईमुग शेंग, मध्य प्रदेश आणि पंजाबमधून २६ ते २७ ट्रक मटार, कर्नाटक येथून दोन ते तीन टेम्पो पावटा आणि ७०० ते ८०० गोण्या कैऱ्या, मध्य प्रदेशातून चार ते पाच टेम्पो लसणाची आवक झाली.
कांदापात, पुदीना, शेपू महागला
मार्केट यार्डात रविवारी कोथिंबिरीच्या सव्वालाख जुड्या आणि मेथीच्या एक लाख जुड्यांची आवक झाली. शेपू, कांदापात आणि पुदीन्याच्या दरांत वाढ, तर मुळे आणि हरभरागड्डीच्या दरांत घट झाल्याचे दिसून आले. कोथिंबीर, मेथी, चाकवत, करडई, अंबाडी, राजगिरा, चुका, चवळई आणि पालकचे दर स्थिर असल्याची माहिती व्यापाऱ्यांनी दिली. घाऊक बाजारात कांदापातीच्या दरात जुडीमागे तीन रुपये, शेपू आणि पुदीन्याच्या गड्डीमागे प्रत्येकी एक रुपयानी वाढ झाली. मुळा गड्डी तीन रुपये आणि हरभरागड्डी दोन रुपयांनी स्वस्त झाली.
पई, सीताफळाच्या दरात घट
मार्केट यार्डातील फळबाजारात रविवारी खरबुजाचे दर वाढले. सीताफळ आणि पपईच्या दरांत घट झाली. लिंबू, अननस, संत्री, मोसंबी, सफरचंद, डाळिंब, चिकू, बोरे आणि पेरुचे दर स्थिर असल्याची माहिती व्यापाऱ्यांनी दिली. रविवारी केरळ येथून अननस पाच ट्रक, मोसंबी ५० ते ६० टन, संत्रा ६० ते ७० टन, डाळिंब ३५ ते ४० टन, पपई २० ते २५ टेम्पो, लिंबांची १५०० ते २००० गोण्या, कलिंगड सात ते आठ टेम्पो, खरबूज दोन ते तीन टेम्पो, सीताफळ ७० ते ८० टन, सफरचंद दीड ते दोन हजार बॉक्स, चिकू दोन हजार बॉक्स आणि बोरांची २००० ते २५०० गोण्यांची आवक झाल्याची माहिती व्यापाऱ्यांनी दिली.
शोभीवंत फुलांना मागणी कायम
मार्केट यार्डात रविवारी लग्नसराईमुळे शोभीवंत फुलांना असलेली मागणी कायम आहे. दरम्यान, आवक आणि मागणी सारखीच असल्याने फुलांचे तेजीतील दरही टिकून आहेत, अशी माहिती व्यापाऱ्यांनी दिली. घाऊक बाजारात एक किलो झेंडूसाठी २० ते ६० रुपये दर होता. गुलछडी ३० ते ५० रुपये, अॅष्टर जुडी १० ते १६ रुपये आणि अॅष्टर सुट्टा ५० ते ८० रुपये, कापरी २० ते ५० रुपये, शेवंती ४० ते १०० रुपये दर होता. (गड्डीचे दर) गुलाबगड्डी पाच ते १५ रुपये, गुलछडी काडी २० ते २५ रुपये, डच गुलाब (२० नग) ६० ते २०० रुपये, जर्बेरा २० ते २५ रुपये, कार्नेशियन ८० ते १२० रुपये असा दर होता.
Users Today : 34