नागपूर : राज्य शिक्षण मंडळाच्या शाळा तसेच महाविद्यालयांमध्ये मानसोपचार समुपदेशकांची नियुक्ती बंधनकारक करावी, अशी मागणी काऊन्सिलर्स असोसिएशन फॉर रिसर्च अॅण्ड एम्पॉवरमेन्ट (केअर)तर्फे केंद्रीय मंत्री नितीन गडकरी यांच्याकडे करण्यात आली.
राष्ट्रीय शिक्षण मंडळाशी संलग्न ‘केअर’ ही संस्था इंटरनॅशनल इन्स्टिट्युट ऑफ रिसर्च इन सायकॉलॉजी अॅण्ड हेल्थ सायन्सेस या संस्थेंतर्गत कार्य करते. केअरचे संचालक डॉ. नितीन विघ्ने यांच्या नेतृत्वात संस्थेच्या शिष्टमंडळाने रविवारी केंद्रीय मंत्री गडकरी यांची भेट घेऊन त्यांना मागण्यांचे निवेदन दिले. मानसशास्त्राच्या सर्व ६६ शाखांमधील मानसोपचार समुपदेशकांना नोंदणी किंवा परवाना द्यावा, समुपदेशकांच्या कामाची पद्धत ठरविण्यासाठी मार्गदर्शक तत्त्वे तयार करावीत.
गुंतागुंतीच्या प्रकरणांमध्ये उपचार करताना साह्यभूत ठरेल या उद्देशाने अन्य समुपदेशकांना त्यांचे अनुभव इतरांना कथन करण्याचे अधिकृत व्यासपीठ निर्माण करावे, समुपदेशकांचे ज्ञान तसेच कौशल्य यात वृद्धी होण्यासाठी नियमितपणे कार्यशाळांचे आयोजन व्हावे, केंद्र तसेच राज्य स्तरावर शिक्षण मंत्रालयाची अधिकृत मान्यता ‘केअर’ला मिळावी, अशाही मागण्या या निवेदनात करण्यात आल्या. फेब्रुवारीमध्ये आयोजित मानसोपचार समुपदेशकांच्या राष्ट्रीय परिषदेची माहितीही गडकरी यांना यावेळी देण्यात आली.
Users Today : 34