Nashik Cylinders Blast: ऑक्सीजन सिलेंडरची वाहतूक करणाऱ्या टेम्पोत स्फोट, ८-१० जण जखमी Video

नाशिक: गंगापूर रोडवरील स्वामी विवेकानंद मार्गावरील शांतिनिकेतन चौकात ऑक्सीजन सिलेंडरची वाहतूक करणाऱ्या टेम्पोत सायंकाळी पावणे सहाच्या दरम्यान स्फोट झाला. नाशिक शहरातील उच्चभ्रू वस्ती समजल्या जाणाऱ्या गंगापूर रोड परिसरातील शांतिनिकेतन चौकात ही घटना घडली. ऑक्सिजन सिलेंडर नेणारे वाहन स्पीड ब्रेकर वर आदळून एका खाजगी कारसह रिक्षा आणि सिलेंडर नेणाऱ्या वाहनाचा चक्काचूर झाला.सुदैवाने घटनेत जीवित हानी झालेली नसली तरी घटनेत ड्रायव्हर जखमी असून खासगी रुग्णालयात दाखल करण्यात आले आहे. याचबरोबर मागे असलेल्या स्कोडा आणि रिक्षाचेही मोठे नुकसान झाले आहे. तसेच परिसरातील ऋषिकेश होरायझन, पंचमी अपार्टमेंट, शैलजा अपार्टमेट यासह परिसरातील इतर इमारती आणि दुकानांच्या काचा फुटल्याने आठ ते दहा जण किरकोळ जखमी झाल्याचीही माहिती आहे. आवाजाची तीव्रता साधारणत: १५० डेसिबल असण्याची शक्यता आहे.या स्फोटाच्या तीव्रतेमुळे वाहनांच्या आणि घरांच्या काचा फुटल्याने नागरिकांमध्ये भूकंप झाल्याची चर्चा परिसरात पसरली होती. त्यानंतर परिसरात हॉस्पिटलसाठी लागणाऱ्या ऑक्सिजन सिलेंडरचा स्फोट झाल्याचे समजले आणि नागरिकांनी सुस्कारा सोडला. याची माहिती मिळताच पोलिसांनी अग्निशमन दलाचे पथक घटनास्थळी दाखल झाले. दरम्यान घटनास्थळी मोठ्या प्रमाणात बघायची गर्दी जमली होती. पोलीस घटनास्थळी दाखल झाले असून पोलिसांकडून घटनास्थळावर पंचनामा सुरू आहे.