छत्रपती संभाजीनगर : कामगारांचे हक्काचे पीएफ अंशदान नियमित भरण्यास टाळाटाळ करणे; तसेच दंड आणि व्याज देण्यास कुचराई करणाऱ्या अशा सुमारे ५५० डिफॉल्टर कंपन्या, आस्थापना विभागात असल्याची धक्कादायक माहिती समोर आली आहे. पीएफ विभागाने अशा डिफॉल्टर कंपन्यांकडून थकीत रक्कम वसुलीसाठी कारवाईचा बडगा उगारला आहे. या कंपन्याकडे सुमारे २३ कोटी रुपयांहून अधिक रक्कम थकीत असल्याची पीएफ विभागाच्या सूत्रांनी सांगितले.- २५ लाख खातेदार
– नियमित अंशदान भरणा नाही
एम्प्लॉयर वा व्यवस्थापन मंडळाने पीएफची रक्कम व रिर्टन फाइल नियमित भरणा करणे आवश्यक असते. मात्र, असे असतानाही अनेक कंपन्या, आस्थापना नियमित अंशदान भरणा करीत नाहीत. कामगारांच्या हक्काच्या पीएफ अंशदान न भरणाऱ्या वा विलंबाने भरणाऱ्या आस्थापनांवर पीएफ विभागाने कारवाईचा बडगा उगारला. अशा कंपनी, आस्थापनांची संख्या सुमारे ५५०च्या घरात आहे.- सव्वा दोन कोटी वसूल
संबंधितांनी थकीत रक्कम तातडीने भरणा करणाऱ्यासाठी विभागाकडून नोटिसा बजाविण्यात आल्या आहेत. त्याचा परिणाम म्हणून आतापर्यंत थकीत पीएफ अंशदानाचे सव्वा दोन कोटी रुपयांची रक्कम वसूल झाली. यासह दंडाचे ५६ लाख, तर थकीत व्याजाचे सुमारे ६० लाख रुपयांची रक्कम वसूल करण्यात आली आहे.२३ कोटी रुपये वसुलीसाठी धडक मोहीम
विभागातील संबंधित डिफॉल्टर कंपन्या, आस्थापनांनी अद्यापही सुमारे सहा कोटी ८२ लाख रुपयांच्या पीएफ रक्कमेचा भरणा केलेला नाही. काही कंपन्या पीएफचे अंशदान उशिराने दाखल करतात. अशा कंपन्यांना १० कोटी ८९ लाख रुपयांचा दंड ठोठवण्यात आला असून, पाच कोटी ४९ लाख रुपयांचे व्याजही आकारण्यात आले आहे. असे एकूण २३ कोटी २० लाख रुपयांच्या वसुलीसाठी पीएफ विभाग कामाला लागला आहे. ‘संबंधितांनी तातडीने थकीत रक्कमेचा भरणा न केल्यास त्यांचे बँक खाते गोठवणे, मालमत्तेची जप्ती, लिलाव यासह अन्य कायदेशीर कारवाईचा सामना करावा लागू शकतो,’ असे सूत्रांनी सांगितले.
भविष्य निर्वाह निधीबाबतच्या नियमांचे पालन न करणाऱ्या कोणी डिफॉल्टर एम्प्लॉयर अथवा इस्टाब्लिशमेंट असतील, त्यांच्यावर नियमाप्रमाणे कठोर कारवाई केली जाईल. अप्रिय घटना टाळण्यासाठी नियमांचे पालन करा.- जगदीश तांबे, विभागीय आयुक्त, पीएफ विभाग, छत्रपती संभाजीनगर
Users Today : 23