चुकीला माफी नाही! रेशन धान्य विकणाऱ्यांना बसणार लगाम, हिवाळी अधिवेशनात मोठा निर्णय

नागपूर : ‘रेशन धान्याची मोठ्या प्रमाणात खुल्या बाजारात विक्री होते. गरज नसतानाही तांदूळ लाभार्थ्यांना वितरित केला जातो. हाच तांदूळ खुल्या बाजारात विकला जातो. राज्यात वेगवेगळ्या भागांत अशा घटना पुढे आल्या आहेत’, असा मुद्दा आमदार यशोमती ठाकूर यांनी प्रश्नोत्तराच्या तासात उपस्थित केला. ‘खुल्या बाजारात रेशन धान्याची विक्री करणाऱ्यांवर कठोर कारवाई करण्यात येईल’, असे आश्वासन अन्न, नागरी पुरवठा व ग्राहक संरक्षण मंत्री छगन भुजबळ यांनी दिले. ‘मटा’ने हा मुद्दा उपस्थित केला होता.

गोंदिया जिल्ह्यात शासन मान्यतेविना तांदळाची उचल केल्याचा मुद्दा आमदार जयंत पाटील यांनी प्रश्नोत्तराच्या तासात उपस्थित केला. रेशन दुकानात मिळणाऱ्या तांदळाचा दर्जाही निकृष्ट दर्जाचा असतो. कुठेही तपासणी केली जात नाही. ७० ते ८० टक्के तांदूळ अपात्र ठरेल, अशी स्थिती आहे. धान्य वाहतूक करण्यातही अतिरिक्त खर्च केला जातो, याकडे पाटील यांनी लक्ष वेधले.