पुणे: राज्याच्या ऐतिहासिक घटनांचा साक्षीदार असलेल्या सिंहगडावरील कल्याण दरवाजा आणि बुरूज लवकरच किल्लेप्रेमींना मूळ रूपात बघण्याची संधी मिळणार आहे. काही वर्षांपूर्वी कल्याण दरवाजाचा मोठा भाग ढासळल्याने बुरूज आणि परिसर धोकादायक झाला होता. पुरातत्त्व विभागाने नुकतीच बुरूजाची पाहणी केली. दोन्ही दरवाज्यांच्या पुनर्बांधणीला सुरुवात झाली आहे.
पुणे दरवाजातून सिंहगडावर प्रवेश केल्यानंतर किल्लेप्रेमी, पर्यटक भटकंतीचा शेवट कल्याण दरवाज्याच्या बुरूजावर करतात. कल्याण गावातील नागरिकही वर्षानुवर्षे याच मार्गाचा वापर करतात. गेल्या काही वर्षांत कल्याण दरवाज्याचा एका बाजूचा भाग ढासळला होता. दगडांच्या भिंतीला तडेही गेले होते. बुरूजाचे दगड किल्ल्याच्या बाहेर उताराच्या बाजूला पडले आहेत. पायऱ्याही खराब झाल्या आहेत. त्यातच गेल्या वर्षी पावसाळ्यात दरवाज्यापासून जवळ अंतरावरील मोठी दरडही कोसळली होती. या धोक्याबद्दल पर्यटक अनभिज्ञ असल्याने त्यांची बुरूजावरील वर्दळ कमी झाली नव्हती.
कल्याण दरवाज्याची वैशिष्ट्ये
– सिंहगडाच्या पश्चिमेस कल्याण दरवाजा आहे.
– कोंढणपूरवरून पायथ्याच्या कल्याण गावातून आल्यास या दरवाज्यातून नागरिकांना प्रवेश करता येतो.
– तेथे एकामागोमाग असे दोन दरवाजे आहेत. त्यातील वरच्या दरवाज्याच्या दोन्हीकडील बुरूजांच्या भिंतीमध्ये पूर्वी अर्धवट बाहेर आलेला हत्ती आणि माहूत अशी दगडी शिल्पे होती.
दरड ढासळल्याने यातील काही भाग आता दिसत नाही.
Users Today : 16