पिंपरीत भीषण अपघात: दुचाकीला डंपरची धडक, शंभर मीटरपर्यंत नेलं फरफटत, पोरासमोर बापाचा अंत

पुणे (पिंपरी-चिंचवड) : पिंपरी चिंचवड परिसरातून एक भीषण अपघाताची बातमी समोर आली आहे. त्रिवेणीनगर – तळवडे रस्त्यावर आज सायंकाळच्या सुमारास भीषण अपघातात एका ४० वर्षीय व्यक्ती डंपरखाली येऊन चिरडला गेला. त्यात त्याचा जागीच मृत्यू झाला आहे. या घटनेनं रस्त्यावर एकच गर्दी झाली होती. यात दुचाकीवरील १२ वर्षीय मुलगा थोडक्यात बचावला आहे.नवनाथ भानूदास गायकवाड (वय ४०) असं मृत्यू झालेल्या दुचाकी चालकाचं नाव आहे. दीपक नवनाथ गायकवाड (१२, रा. सोनवणे वस्ती, ताथवडे) असे अपघातात बचावलेल्या मुलाचे नाव आहे. या अपघाताने या परिसरात काहीवेळ तणावाचे वातावरण निर्माण झाले होते. मुलगा रस्त्याच्या बाजूला पडल्याने तो थोडक्यात बचावला आहे.मिळालेल्या माहितीनुसार, त्रिवेणीनगर रस्त्यावरून नवनाथ गायकवाड हे आपल्या १२ वर्षाच्या मुलासोबत त्यांच्या दुचाकीवरून जात होते. तेव्हा मागून येत असलेल्या डंपरने त्यांच्या दुचाकीला धडक दिली. त्यामुळे गाडी चालवत असलेले नवनाथ हे दुचाकीवरून खाली पडले. त्यांना त्या डंपरने जवळपास शंभरहून अधिक मीटर फरफट नेले. त्यांच्या डोक्यावरून डंपरचे चाक गेल्याने त्यांचा जागेवरच मृत्यू झाला. सुदैवाने मागे बसलेला त्यांचा मुलगा या अपघातात थोडक्यात बचावला आहे. अपघातामुळे रस्त्यावर रक्ताचा सडा पडला होता.अपघाताची माहिती मिळताच पोलीस घटनास्थळी दाखल झाले. त्यांनी अग्निशामक दलाला पाचारण करत रस्त्यावर पडलेले रक्त साफ केलं. रस्त्यावर झालेली वाहतूक कोंडी थोड्याच वेळात पोलिसांनी सुरळीत केली. या रस्त्यावर दिवसेंदिवस अपघातांचे प्रमाण वाढत आहे. काही दिवसांपूर्वी अपघातात एका महिलेचा मृत्यू झाला होता. त्यावेळी नागरिकांनी रस्त्यावर उतरून आंदोलन केले होते. मात्र, आज पुन्हा अपघात झाल्याने नागरिकांचा जीव धोक्यात आला असल्याचे स्थानिक नागरिकांनी सांगितले.