Pune News : वेळ सकाळी नऊ-दहाची…एकामागोमाग एक पालक आणि मुलं मैदानावर जमली. पालकांनी गोष्टीचे पुस्तक हातात घेतलं…अन् मोठ्या उत्सुकतेने त्यातील गोष्ट आपल्या समोर बसलेल्या मुलांना वाचून दाखविली. याप्रकारे एकाच वेळी तीन ते पाच मिनिटे एकत्रित पुस्तक वाचनाचा कार्यक्रम मोठ्या उत्साहपूर्ण वातावरणात झाला.
अन् ‘पालकांनी आपल्या पाल्यांना गोष्टी सांगायच्या’ या उपक्रमात तब्बल तीन हजार ६६ पालक सहभागी होत…पालक आणि विद्यार्थी यांच्या साक्षीने भारताने चीनचा विश्वविक्रम मोडून काढत नवा विश्वविक्रम नोंदविला.
निमित्त होते राष्ट्रीय पुस्तक न्यासाच्या वतीने आयोजित पुणे पुस्तक महोत्सवानिमित्त पुणे महानगरपालिकेने सर परशुरामभाऊ महाविद्यालयाच्या मैदानात ‘पालकांनी आपल्या पाल्यांना गोष्टी सांगायच्या’ उपक्रम आयोजित केला होता.
या उपक्रमाच्या विश्वविक्रमाची नोंद झाल्यानंतर ढोल-ताशांच्या गजर आणि देशभक्तिपर गीते याद्वारे आनंदोत्सव साजरा करण्यात आला.यावेळी महापालिका आयुक्त विक्रम कुमार, अतिरिक्त आयुक्त विकास ढाकणे, सावित्रीबाई फुले पुणे विद्यापीठाचे कुलगुरू डॉ. सुरेश गोसावी, उद्योजक जय काकडे,
शिक्षण प्रसारक मंडळीच्या व्यवस्थापन परिषदेचे अध्यक्ष ॲड. एस. के. जैन, खडकी शिक्षण संस्थेचे अध्यक्ष कृष्णकुमार गोयल, न्यासाचे संचालक युवराज मलिक, अभिनेत्री प्राजक्ता माळी, संयोजक राजेश पांडे, माजी महापौर मुरलीधर मोहोळ, प्रसेनजित फडणवीस, राहुल पाखरे, भाग्यश्री मंठाळकर आदी मान्यवर उपस्थित होते.
Users Today : 5