शिर्डी: ‘सबका मालिक एक’ आणि श्रद्धा सबुरीचा संदेश देणाऱ्या साई बाबांच्या दरबारात दर दिवशी देश विदेशातील हजारो साई भक्त हजेरी लावतात. त्याच बरोबर ग्रामस्थ देखील साई दर्शन करून आपल्या दैनंदिन कामाची सुरुवात करत असतात. परंतु आता साई दर्शनासाठी शिर्डी ग्रामस्थांना ओळखपत्र सक्ती करण्यात आले आहे. न्यायालयाच्या सुरक्षेच्या आदेशानंतर मंदिर सुरक्षा विभागाने हा निर्णय घेतलाय.
शिर्डी येथील साईबाबा मंदिरात दर्शन पास देण्याबाबत अध्यक्ष आणि मुख्य कार्यकारी अधिकारी यांना कडक धोरण अवलंबण्याची परवानगी औरंगाबाद खंडपीठाने दिली आहे. पासेसची खात्री करूनच मंदिरामध्ये प्रवेश द्यावा. ज्या भाविकांना दर्शन घ्यायचे आहे त्यांची नावे सांगून आणि पास कोणी विकत घेतला आहे त्याची ऑनलाइन नोंद ठेवून दर्शन पास फक्त त्यांनाच दिला जाईल याची काळजी घ्यावी असे आदेशात म्हटले आहे.कोपरगाव येथील सामाजिक कार्यकर्ते संजय काळे यांनी शिर्डी येथील साईबाबा मंदिर व परिसराची सुरक्षाव्यवस्था केंद्रीय पोलीस राखीव बल किंवा केंद्रीय औद्योगिक सुरक्षा बल यांच्यामार्फत करण्यात यावी यासाठी मुंबई उच्च न्यायालयाच्या औरंगाबाद खंडपीठात अॅड. सतीश तळेकर यांच्यामार्फत जनहित याचिका दाखल करून आव्हान दिले आहे. पोलीस प्रशासन व साईबाबा संस्थानच्या विश्वस्तांनी वेळोवेळी मंदिर सुरक्षा केंद्रीय पोलीस राखीव बल किंवा केंद्रीय औद्योगिक सुरक्षा बल यांच्यामार्फत देण्यात यावी यासाठी विविध स्तरावर पाठपुरावा केले आहे. पण कोणतीही कार्यवाही झालेली नाही.शिर्डी येथे गुन्हेगारीचे प्रमाण रोज वाढत आहे. त्यामुळे भाविकांची सुरक्षाव्यवस्था मजबूत करण्याची गरज आहे, असे याचिकेत नमूद करण्यात आले आहे. उच्च न्यायालयाने प्रबंधक, उच्च न्यायालय, आंध्र प्रदेश यांना आंध्र प्रदेशस्थित तिरुपती बालाजी देवस्थान येथे तैनात असलेल्या सुरक्षाव्यवस्था संदर्भात गोपनीय अहवाल सादर करण्याची विनंती केली होती आणि त्यानुसार प्रबंधक, उच्च न्यायालय यांनी गोपनीय अहवालाद्वारे तिरुपती देवस्थानात असलेल्या सुरक्षा संदर्भात माहिती सादर केली. त्यावर उच्च न्यायालय अभ्यास करून पुढील निर्णय घेणार आहे.न्यायालयाने जिल्हा न्यायाधीश, अहमदनगर तथा अध्यक्ष यांनी सादर केलेल्या गोपनीय अहवालामधील गंभीर निरीक्षणे लक्षात घेता मंदिराच्या सुरक्षेसंदर्भात बदल न करता सर्व सुरक्षाव्यवस्था प्रधान जिल्हा न्यायाधीश तथा अध्यक्षांच्या आदेशानुसारच चालेल अथवा बदलेल असे निर्देश दिले. मंदिराच्या सुरक्षेसंदर्भात निर्णय घेताना अध्यक्षांच्या परवानगीशिवाय कुठलाही बदल करता येणार नाही असे नमूद केले आहे. प्रधान जिल्हा न्यायाधीश, अहमदनगर तथा अध्यक्ष यांनी सादर केलेल्या अहवालाची दखल घेत उच्च न्यायालयाचे न्या. आर. व्ही. घुगे व न्या. वाय. जी. खोब्रागडे यांनी न्यायालयाने दिलेल्या आदेशाची अंमलबजावणी न केल्यास तो आदेशाचा अवमान समजला जाईल, असे आदेशात म्हंटले आहे. या प्रकरणात याचिकाकर्त्यांच्या वतीने प्रज्ञा तळेकर व अजिंक्य काळे काम पाहत आहे. तर शासनाच्या वतीने अॅड. अमरजित गिरासे, संस्थानच्या वतीने अॅड. संजय मुंढे काम पाहत आहे.
आधार कार्ड तपासणार
काही माजी विश्वस्तांनी दुपारच्या आरतीसाठी पास मिळवून ते बाहेर प्रिमियम दराने विकल्याबद्दलच्या अहवालाप्रमाणे उच्च न्यायालयाने अध्यक्ष आणि मुख्य कार्यकारी अधिकारी यांना पास देण्याबाबत कडक धोरण अवलंबण्याची परवानगी दिली. पासेसची खात्री करूनच मंदिरामध्ये प्रवेश द्यावा असेही सांगितले. ज्या भाविकांना दर्शन घ्यायचे आहे त्यांची नावे सांगून आणि पास कोणी विकत घेतला आहे त्याची ऑनलाइन नोंद ठेवून दर्शन पास फक्त त्यांनाच दिला जाईल याची काळजी घ्यावी असे सांगितले. व्हीआयपी दर्शनासाठी पासचे वाटप करताना भाविकांचे आधार कार्ड तपासून त्या पासवर त्यांचा क्रमांक नमूद केला जाईल, याची काळजी घ्यावी असे आदेश दिले आहेत.शिर्डी ग्रामस्थ दररोज मंदिर परिसरातील महादेव, शनी मंदिरात देखील जात असतात. सामान्य भक्तांसाठी मात्र नवीन दर्शन रांगेतून असलेल्या दर्शन व्यवस्थेत कुठलाही बदल करण्यात आलेला नाही. दरम्यान कोट्यवधी भाविकांचे श्रद्धास्थान असलेल्या शिर्डीतील साईबाबांच्या दर्शनासाठी शिर्डी ग्रामस्थांना यापूर्वी समाधी मंदिरात दर्शनासाठी जाण्यासाठी गावकरी गेटने सोडण्यात येत होते. तेव्हा ओळखपत्राची सक्ती नव्हती. गावकऱ्यांच्या नावाखाली बाहेरची मंडळी देखील ग्रामस्थ असल्याचं सांगत याच गेटने आत जात असल्याचे अनेकदा निदर्शनास आले आहे. त्या अनुषंगाने साईबाबा संस्थानच्या सुरक्षा विभागाने ओळखपत्र तपासूनच आत सोडण्याचा निर्णय घेतला. मात्र, आता यापुढे ग्रामस्थांना प्रत्येकवेळी ओळखपत्र दाखवूनच मंदिर परिसरात प्रवेश करावा लागणार आहे. यामध्ये समाधी दर्शन, आरती अथवा मंदिर परिसरातील विविध मंदिरांत दर्शनासाठी जाताना ओळखपत्र, आधारकार्ड बंधनकारक करण्यात आले आहे.
Users Today : 45