पिंपरी: प्रेमसंबंध ठेवण्यास नकार दिल्याने सोसायटीमध्ये स्वच्छतेचे काम करणाऱ्या महिलेचा प्लंबरने मारहाण करून खून केल्याची घटना बुधवारी (१३ डिसेंबर) रावेत येथील फेलिसिटी सोसायटीच्या क्लब हाउसमध्ये घडली. आरोपीला रावेत पोलिसांनी गजाआड केले आहे.
प्रतिमा प्रमोद यादव (वय ३२, रा. फेलिसिटी सोसायटी, रावेत, मूळ – बिलासपूर, छत्तीसगड) असे खून झालेल्या महिलेचे नाव आहे. आरिफ झुल्फिकार मलिक (वय २१, रा. मोशी) याला पोलिसांनी अटक केली आहे. या प्रकरणी महिलेचे पती प्रमोद रामेश्वर यादव (वय ३४) यांनी रावेत पोलिस ठाण्यात फिर्याद दिली आहे.वरिष्ठ पोलिस निरीक्षक अमरनाथ वाघमोडे यांनी दिलेल्या माहितीनुसार, फिर्यादी प्रमोद यादव यांचे कुटुंब रावेत येथील फेलिसिटी सोसायटीमध्ये वास्तव्यास आहे. त्यांना तीन मुले आहेत. प्रमोद यादव आणि त्यांची पत्नी प्रतिमा हे दोघेही त्याच सोसायटीमध्ये हाउसकीपिंगचे काम करीत होते. आरोपी हा त्या सोसायटीमध्ये प्लंबिंगचे काम करीत होता. बुधवारी सकाळी साडेअकरा वाजता प्रतिमा कामावर गेल्या. त्या सोसायटीच्या क्लब हाउसमध्ये काम करीत असताना आरिफने त्यांच्याकडे मोबाइल नंबरची मागणी केली; तसेच आपण प्रेमसंबंधांत राहू असे म्हटले. याला प्रतिमा यांनी विरोध केला.
Users Today : 2