वातावरणात बदल; १६ आमदारांची प्रकृती बिघडली; अस्वस्थ वाटू लागल्याने अबू आझमींवर उपचार

नागपूर: विधीमंडळाचे हिवाळी अधिवेशन सध्या सुरू आहे. यादरम्यान बदलत्या वातावरणाने आमदार तसेच विधानभवन परिसरात कर्तव्यावर असलेल्या कर्मचाऱ्यांना सर्दी-पडसे, हगवण तसेच रक्तदाबाच्या त्रासाने हैराण केले आहे. प्राप्त माहितीनुसार, आठ दिवसांत १६ आमदारांची प्रकृती बिघडली असून त्यांनी लागलीच परिसरात असलेल्या डिस्पेन्सरीत जाऊन उपचार घेतले आहेत.हिवाळी अधिवेशनाच्या निमित्ताने नागपुरात येणारे मंत्रालयीन कर्मचारी आणि विधानसभा, विधानपरिषदेतील सदस्यांसाठी विधिमंडळ परिसरात डिस्पेन्सरी सुरू करण्यात आली आहे. वैद्यकीय शिक्षण आणि संशोधन विभाग आणि सार्वजनिक आरोग्य मंत्रालयाच्याद्वारे संयुक्तरित्या संचालित या डिस्पेन्सरीत २४ तास निवासी वैद्यकीय अधिकारी आणि परिचारिकांची नियुक्ती करण्यात आली आहे. अधिवेशन सुरू झाल्यापासून आतापर्यंत येथून १६ आमदारांनी नियमित तपासणी करून घेतली. यातील बहुतांश आमदारांना रक्तदाब, मधुमेहासारख्या तक्रारी आहेत. विधिमंडळातील डिस्पेन्सरीतील बाह्यरुग्ण विभागात दररोज १५० ते १९० जण तपासणीसाठी येतात.
त्यापैकी बहुतांश जणांना सर्दी, ताप, खोकला, अपचन, वांत्याच्या तक्रारी घेऊन उपचाराला येत आहेत. यापैकी १०० जणांच्या रक्ताशी निगडीत चाचण्याकरून त्यांना पुढील उपचारासाठी रेफर केले जात आहे. वादग्रस्त वक्तव्यांमुळे इतरांचे बीपी वाढविणाऱ्या समाजवादी पार्टीचे आमदार अबू आझमी यांना गुरुवारी दुपारी १२ वाजताच्या सुमारास अचानक अस्वस्थ वाटू लागले. रक्तदाब वाढल्याची तक्रार घेऊन ते विधिमंडळ परिसरातील डिस्पेन्सरीत दाखल झाले. तेथे उपस्थित निवासी वैद्यकीय अधिकाऱ्यांनी लगेच त्यांची तपासणी करून औषधोपचार केले. रक्तदाबासोबतच अंगात कणकण वाटू लागल्याने त्यांनी तातडीने परिसरातील डिस्पेन्सरीत धाव घेतल्याने सुदैवाने पुढील अनर्थ टळला.अधिवेशनकाळात बंदोबस्तासाठी हजारो पोलीस नागपुरात तैनात आहेत. राज्यातील सर्वच जिल्ह्यांमधून हवालदार पदापासून ते वरिष्ठ पोलीस अधिकाऱ्यांचीही अधिवेशन काळात तात्पुरती नियुक्ती करण्यात आली आहे. नंदूरबार येथून आलेल्या एका पोलीस निरीक्षकाला अधिवेशनाच्या दुसऱ्याच दिवशी ८ डिसेंबरला अस्वस्थ वाटू लागल्याने विधिमंडळ परिसरातील डिस्पेन्सरीत दाखल करण्यात आले. त्यांचा इसीजी काढल्यानंतर या पोलीस निरिक्षकाला हृदयविकाराचा झटका आल्याचे निदान डॉक्टरांनी केले. त्यांना तातडीने पुढील उपचारासाठी इंदिरा गांधी शासकीय वैद्यकीय महाविद्यालय आणि रुग्णालयात रेफर करण्यात आले. तेथे त्यांची अँजोग्राफी करून ब्लॉकेजेस आढळल्याने त्यांच्यावर प्लॅटिना रुग्णालयात पुढील उपचार सुरू आहेत. याखेरीज एका हवालदाराच्या हृदयाचे ठोके वाढल्याने त्यांनाही पुढील उपचारासाठी मेयोत रेफर करण्यात आले.