लाखो शेतकऱ्यांना कर्जमाफीची प्रतीक्षा; ५ हजार ९०० कोटींचे कर्ज थकीत

Nagpur News: सहा वर्षांपूर्वी राज्य सरकारने छत्रपती शिवाजी महाराज सन्मान योजनेतून शेतकऱ्यांसाठी कर्जमाफी घोषित केली होती. राज्यातील सर्वच जिल्ह्यात धनत्रयोदशीच्या दिवशी गाजावाजा करीत कर्जमाफी केल्याच्या प्रमाणपत्रासह महिलांना साडी-चोळीचे वाटप केले होते.परंतु या योजनेतील सहा लाखांवर शेतकऱ्यांना अद्यापही कर्जमाफी मिळाली नसल्याची धक्कादायक बाब उघडकीस आल्याने राज्य सरकारच्या शेतकऱ्यांबाबत गांभीर्यावर प्रश्नचिन्ह उपस्थित झाले आहे.२०१७ मध्ये तत्कालीन युती सरकारने छत्रपती शिवाजी महाराज शेतकरी सन्मान योजना जाहीर केली होती. या योजनेत राज्यातील ४४ लाख ४ हजार शेतकऱ्यांना १८ हजार ७६२ कोटी रुपयांच्या कर्जमाफीचा लाभ होणे अपेक्षित होते.शेतकऱ्यांना या योजनेला लाभ देण्यासाठी सरकारने त्यावेळी मोठा गाजावाजा करीत प्रत्येक जिल्ह्यात पालकमंत्री व जिल्हाधिकाऱ्यांच्या उपस्थितीत धनत्रयोदशीच्या दिवशी कार्यक्रम घेतले. या कार्यक्रमातून निवडक शेतकऱ्यांना कर्जमाफ झाल्याचे प्रमाणपत्र, साडी-चोळी, कपडे आदी देऊन सपत्निक सत्कार करण्यात आला होता.विशेष म्हणजे ‘तुमचे कर्ज माफ झाले, सातबारा कोरा झाला असून आनंदात दिवाळी साजरी करा’, असे या कार्यक्रमातून सांगण्यात आले. परंतु त्यानंतर २०२३ चीही दिवाळी गेली. परंतु यातील ६ लाख ५६ हजार शेतकरी कर्जमाफीपासून वंचित आहे.यात विदर्भातील नागपूर, अकोला जिल्ह्यातील मोठ्या प्रमाणात शेतकऱ्यांची फसवणूक झाल्याची भावना व्यक्त होत आहे. राज्य सरकारचा निषेध करण्यासाठी दोन महिन्यापूर्वी धनत्रयोदशीच्या दिवशी शेतकऱ्यांनी अकोला जिल्हाधिकारी कार्यालयापुढे ठिय्या आंदोलन केले होते.या योजनेचा लाभासाठी आजही काही शेतकरी व संघटनांचे प्रतिनिधी नागपूरच्या हिवाळी अधिवेशनात विधानभवन परिसरात फिरत आहेत. परंतु त्यांना कुठेही दिलासा मिळत नसल्याचे चित्र आहे.