पुणे : ‘शिक्षणाचे माहेरघर’ आणि ‘सांस्कृतिक राजधानी’ अशी बिरूदावली मिरवणाऱ्या सुसंस्कृत पुण्यात तीन ते चार दिवसाला खुनाची एक घटना घडू लागली आहे. शहरात वर्षभरात खुनाच्या ८२ घटना घडल्या असून, यातील अनेक घटना किरकोळ कारणावरून घडल्या आहेत. या गुन्ह्यांसाठी टोळ्या अल्पवयीन मुलांचा वापर करीत असल्याने ही गुन्हेगारी रोखायची कशी, असा प्रश्न पोलिसांसमोर उभा राहिला आहे.
वेगाने विकसित होत असलेल्या पुणे आणि उपनगरांत त्याच गतीने गुन्हेगारी वाढत असल्याची माहिती केंद्रीय गुन्हे नोंदणी अहवालातून (एनसीआरबी) समोर आली आहे. अफाट नागरीकरण होत असलेल्या पुण्यात संघटित गुन्हेगारीसोबत खून, अपघात, चोरी, दरोडा, महिला अत्याचार, अल्पवयीन मुलांवर अत्याचार, सायबर असे गुन्हे; तसेच मुली आणि महिला बेपत्ता होण्याचे प्रमाण वाढले आहे. या वर्षात आतापर्यंत खुनाच्या ८२ घटना घडल्या आहेत. तर, ‘एनसीआरबी’च्या अहवालानुसार मागील वर्षांत खुनाच्या १०५ घटना घडल्या आहेत.
मागील वर्षीच्या तुलनेत खुनाच्या गुन्ह्यांचे प्रमाण काहीसे घटले असले, तरी या गुन्ह्यांमध्ये अल्पवयीन मुलांचा व टोळ्यांचा सहभाग ही चिंतेची बाब झाली आहे. अल्पवयीन मुलांच्या भवितव्याच्या दृष्टीने कायदे पूरक असल्याने त्यांना अटक होत नाही. याचाच फायदा टोळ्यांकडून घेतला जात असल्याचे दिसून येत आहे. देशात गुन्हेगारीसाठी अल्पवयीन मुलांचा सर्वाधिक वापर महाराष्ट्रात होत असल्याची धक्कादायक माहिती ‘एनसीआरबी’च्या अहवालातून समोर आली आहे. कायद्याच्या कचाट्यातून वाचण्यासाठी अल्पवयीन मुलांकडून गुन्हे घडवून आणण्याची टोळ्यांची पद्धत संपूर्ण राज्यभर दिसून येत आहे.गावठी कट्ट्यांचा वापर
दोन वर्षांत पुण्यात कोयताधारी टोळक्यांनी कायदा आणि सुव्यवस्थेचे आव्हान निर्माण केले असताना आता गुन्हेगारीसाठी अल्पवयीन मुलांचा वापर वाढल्याने या टोळ्यांवर लगाम घालणे पोलिसांसाठी तापदायक ठरू लागले आहे. १५ ते ३० या वयोगटातील सराईत गुन्हेगारांकडे कोयत्यानंतर आता गावठी कट्टे सहज आढळत आहेत. शहरात तीन वर्षांत सुमारे २५० बेकायदा पिस्तुले आणि हजारपेक्षा जास्त जिवंत काडतुसे पोलिसांनी जप्त केली आहेत. शहरातील टोळक्यांना मध्य प्रदेशातून ४० ते ५० हजार रुपयांत गावठी कट्टे सहज उपलब्ध होत आहेत.वाढती गुन्हेगारी चिंतेची
– शहरात चालू वर्षांत खुनाचे ८२ गुन्हे
– शहरात कोयता गँगचा उच्छाद
– कोयतेधारी टोळ्यांमध्ये अल्पवयीन मुलांचा वाढता सहभाग
– १५ ते ३० या वयोगटातील सराईत गुन्हेगारांकडे कोयते आणि गावठी कट्टे
– तीन वर्षांत सुमारे २५० बेकायदा पिस्तुले आणि हजारपेक्षा जास्त जिवंत काडतुसे जप्त
शहरात चालू वर्षांत खुनाच्या ८२ घटना घडल्या आहेत. यातील बहुतांश गुन्हे किरकोळ कारणावरून घडले आहेत. शहरात या वर्षांत झुंडबळीची (मॉब लिचिंग) एकही घटना घडलेली नाही.- अमोल झेंडे, उपायुक्त, गुन्हे शाखा
Users Today : 2