समृद्धीवर पुन्हा अपघात! अज्ञात वाहनाची कारला समोरुन जोरदार धडक, तिघांचा जागीच मृत्यू

बुलढाणा: जिल्ह्यातील समृद्धी महामार्गावर अनियंत्रित वाहन चालवण्यामुळे अपघाताचे सत्र सतत सुरू असते. अनेक उपाययोजना करून देखील पाहिजे तसा प्रतिसाद वाहन चालकांकडून मिळत नाही. घालून दिलेले नियम पाळत नसल्याने असे अनेक अपघात समोर येतात, असाच एक अपघात आज सकाळी समृद्धी महामार्गावर घडला.

बुलढाणा जिल्ह्यातील समृद्धी महामार्गावर एका कारला अज्ञात वाहनाने पाठीमागून जोरदार धडक दिली. या अपघातात ३ जणांचा मृत्यू झाला. तर दोघे गंभीर जखमी झाले. ही धक्कादायक घटना बुलढाणा जिल्ह्यातील मुंबई कॉरिडॉरवरील चॅनल क्रमांक ३०४ येथे रविवारी पहाटेच्या सुमारास घडली.

मुकेश अनुज राम मेहेर, लताबाई पुरुषोत्तम मेहेर, अत्मजा मुनोरबोद अशी मृतांची नावे आहेत. अपघातात दोनजण जखमी झाले असून त्यांना उपचारासाठी छत्रपती संभाजीनगर येथील रुग्णालयात दाखल करण्यात आलं आहे. मृतक आणि जखमी छत्तीसगड येथील रहिवासी असल्याची माहिती आहे. याप्रकरणी पोलिसांनी अज्ञात वाहनचालकाविरोधात गुन्हा दाखल केला असून त्याचा शोध घेतला जात आहे.

विकासाचा मार्ग म्हणून ओळखल्या जाणाऱ्या समृद्धी महामार्गावरील अपघातांच्या घटना काही थांबण्याचं नाव घेत नाही. समृद्धी महामार्ग प्रवाशांसाठी कर्दनकाळ ठरत असल्याचं समोर येतं आहे. महामार्गावर होणाऱ्या भीषण अपघातांच्या घटनांनी आतापर्यंत अनेक कुटुंब उद्ध्वस्त झाली आहेत. अपघातांच्या मालिकेनंतर समृद्धीवर प्रवास करायचा की नाही? असा प्रश्न आता पडत आहे. काल देखील एका खाजगी बस आणि एसटी बस मध्ये झालेल्या अपघातात एक महिला ठार तर २५ जखमी झाल्याची घटना घडली होती. ही घटना ताजी असतानाच हा अपघात झाला.