कोल्हापूर : लोकसभा मतदारसंघात निवडणुकीची रणधुमाळी सुरू आहे. सकाळी सात वाजल्यापासून मतदान प्रक्रियेला सुरुवात झाली असून मतदान केंद्राबाहेर चांगली गर्दी पाहायला मिळत आहे. विशेषतः वयोवृद्ध मतदार दुपारी वाढत असलेले तापमान पाहता सकाळच्या सत्रात मतदान उरकण्यावर भर देताना पाहायला मिळत होते. मात्र कोल्हापुरातील उत्तरेश्वर पेठेतील रमाबाई आंबेडकर शाळेत सुरू असलेल्या मतदान केंद्रावर महादेव श्रीपती सुतार (वय वर्ष ६९) रा.उत्तरेश्वर पेठ कोल्हापूर या मतदान करायला गेलेल्या मतदाराचा हृदयविकाराच्या तीव्र झटक्याने दुर्दैवी मृत्यू झाला आहे.
अधिक माहिती अशी की, कोल्हापूर लोकसभा निवडणुकीसाठी आज प्रत्यक्ष मतदान पार पडत आहे. या मतदान प्रक्रियेत मतदान करण्यासाठी उत्तरेश्वर पेठ येथे राहणारे महादेव श्रीपती सुतार हे सकाळी १० च्या सुमारास मतदान केंद्रावर पोहोचले. दरम्यान ते रांगेत उभे असतानाच अचानक चक्कर आल्याने जागेवरच कोसळले. या घटनेमुळे मतदान केंद्राच्या परिसरात काही काळ कार्यकर्त्यांची तारांबळ उडाली. नातेवाईकांसह राजकीय पक्षांच्या कार्यकर्त्यांनी तातडीने त्यांना सीपीआर रुग्णालयात दाखल केले.मात्र उपचारापूर्वीच त्यांचा हृदयविकाराच्या झटक्याने निधन झाल्याचे डॉक्टरांनी सांगितले. दरम्यान, उत्तरीय तपासणीनंतर मृतदेह नातेवाईकांच्या ताब्यात देण्यात आला. अचानक झालेल्या या दुर्दैवी घटनेमुळे परिसरात एकच हळहळ व्यक्त करण्यात येत आहे.
जिल्ह्यात ४० अंशावर अधिक तापमान
गेल्या काही दिवसात कोल्हापुरात तापमानात वाढ होत असून आज जिल्ह्यात ४० अंशाहून अधिक तापमान असल्याने सकाळी नऊ वाजल्यापासूनच उन्हाच्या झळा जाणवत आहेत. यामुळे जिल्ह्यातील मतदारांनी सकाळी लवकरच मतदान करण्याला प्राधान्य दिल्याचे चित्र पाहायला मिळाले.
Users Today : 1