दारूच्या नशेत रेल्वेत महिला सहकाऱ्याची छेड, पोलीस दलात खळबळ, दोघांवर धडक कारवाई

लोकसभा निवडणुकीच्या चौथ्या टप्प्यात नागपूर पोलीस दलातील अनेक पोलीस कर्मचारी निवडणूक ड्युटीसाठी वेगवेगळ्या ठिकाणी पाठवण्यात आले होते. १० मे रोजी नागपुरातील गिट्टीखदान पोलीस ठाण्यात कार्यरत असलेले हेड कॉन्स्टेबल युवराज राठोड आणि आदित्य यादव हे देखील पुण्याला रेल्वेने निघाले होते. प्रवास करत असताना दोन्ही पोलीस कर्मचाऱ्यांनी रेल्वेत दारू प्यायली आणि दारू प्यायल्यानंतर दोघांनी डब्यात गोंधळ घालायला सुरवात केली. यावेळी पोलीस मुख्यालयात कार्यरत असलेली एक महिला पोलीस कॉन्स्टेबल देखील ट्रेनमध्ये निवडणूक ड्युटीसाठी जात होत्या. या दोन पोलीस कर्मचाऱ्यांनी दारूच्या नशेत अश्लील कृत्य करत, महिला कर्मचाऱ्यांची छेड काढायला सुरुवात केली. अन्य कर्मचान्यांनी त्यांना विरोध केला असता दोघांनी सहकाऱ्यांना शिवीगाळ करत ठार मारण्याची धमकी दिली.