सोलापूर: सोलापूर आणि इंदापूर (पुणे) या दोन जिल्ह्यादरम्यान असलेल्या उजनी धरणात सहा जणांचा बुडून मृत्यू झाल्याने सर्वत्र हळहळ व्यक्त केली जात आहे. करमाळा तालुक्यातील झरे गावातील गोकूळ दत्तात्रय जाधव (वय ३०), कोमल गोकूळ जाधव (वय २५), शुभम गोकूळ जाधव (वय दीड वर्ष), माही गोकूळ जाधव (वय ३, रा. झरे, ता. करमाळा, जि. सोलापूर) यांचा या दुर्घटनेत मृत्यू झाला आहे. मृत्यूची वार्ता समजताच झरे गावातील सर्वच ग्रामस्थ भीमा नदीच्या किनाऱ्यावर येऊन बसले आहेत. मंगळवार (२१ मे) रात्रीपासून शोधकार्य सुरू आहे.
येथील झरे गावात काल रात्रीपासून शोककळा पसरली आहे. गावात सकाळपासून एकाही घरात चूल पेटलेली नाही. गावातील ग्रामस्थ देव पाण्यात ठेवून बसले आहेत. एनडीआरएफची टीम बुधवारी सकाळी दाखल झाली असून अजूनही शोध सुरूच आहे. मात्र अद्यापही एकाचा देखील मृतदेह हाती लागले नाही.
जाधव कुटुंबीयावर दुखाचा डोंगर कोसळला
करमाळा तालुक्यातील झरे गावात गोकुळ दत्तात्रय जाधव हे आई, वडील, भाऊ, दोन बहिणींसोबत लहानाचे मोठे झाले. काही वर्षांपूर्वी गोकुळचे लग्न कोमल यांच्यासोबत झाले होते. प्लम्बिंगचे काम करत गोकुळ जाधव यांचा अनेक ग्रामस्थांशी दांडगा संपर्क होता. मनमिळावु स्वभावाचे गोकुळ जाधव व त्यांची पत्नी कोमल आपल्या दोन चिमुकल्यांसह हे मंगळवारी दुपारी कळाशी (ता इंदापूर) येथून बोटीने गावाकडे झरे (ता करमाळा,जि सोलापूर) येत होते. एकूण सात जण या बोटीत होते. सायंकाळच्या सुमारास बोट (लॉन्च) नदीच्या मधोमध जाताच पावसाच्या सरी, वादळी वारा सुरू झाला. त्यामुळे बोट हेलकावे खाऊ लागली. बघता बघता बोट पाण्यात उलटली आणि गोकुळ जाधव, कोमल जाधव आणि दोन्ही चिमुकले भीमा नदीच्या पात्रात गायब झाले.
कार्यक्रमाला शॉर्टकट्स जाणे जीवावर बेतले
इंदापूर तालुक्यातील आणि करमाळा तालुक्यातील अनेक ग्रामस्थ कळाशी ते कुगाव असा प्रवास बोटीने करतात. महामार्गाने प्रवास करण्यासाठी मोठा वळसा घालावा लागतो आणि जवळजवळ ६० किमीपर्यंत वळसा घालावा लागतो. बोटीने प्रवास केला असता ३० किमीपर्यंतचं अंतर कमी होतं. त्यामुळे भीमा नदी काठचे अनेक ग्रामस्थ बोटीने प्रवास करतात. झरे(ता. करमाळा) येथील जाधव कुटुंबीय मंगळवारी एका कार्यक्रमासाठी कळाशी गावाला गेले होते, परतीच्या मार्गावर असताना शॉर्टकटचा पर्याय निवडला आणि अख्ख्या कुटुंबाला जीव गमवावा लागला आहे.
Users Today : 54