टक्केवारीपोटी शहरातील विकास कामे निकृष्ट दर्जाची!

नगर परिषद मुख्याधिकारी, अभियंता, कंत्राटदारांचे संगनमत असल्याची ‘आप’ची तक्रार

जिल्हा प्रतिनिधी/ प्रदिप पट्टेबहादुर

वाशिम : वाशिम नगर परिषदेअंतर्गत केल्या जाणाऱ्या विकास कामांच्या टक्केवारी पोटी ही कामे निकृष्ट दर्जाची होत आहेत. यामध्ये प्रामुख्याने वाशिम नगरपरिषद मुख्याधिकारी, नगर अभियंता व कंत्राटदार यांच्या संगमताने हा सर्व प्रकार घडत असल्याची तक्रार ‘आप’चे राम पाटील डोरले यांनी जिल्हाधिकारी यांच्याकडे केली आहे.

जिल्हाधिकारी यांना दिलेल्या तक्रारी नुसार, वाशिम नगरपरिषदेमध्ये गेल्या २ वर्षांपासून प्रशासक असल्यामुळे अधिकारी वर्गावर कुणाचाही धाक राहिला नाही.  त्यामुळे आपले आर्थिक हीत साधण्यासाठी ते निकटवर्तीय कंत्राटदाराला तसेच जो जास्त टक्केवारी देईल त्यांनाच कंत्राट देऊन शहरातील रस्ते निकृष्ट दर्जाचे होत आहे. याबाबत अनेक तक्रारी देऊनही त्यावर कुठलीही कारवाई केली जात नाही. गेल्या दोन वर्षांपासून शहरांमध्ये करण्यात आलेल्या सिमेंट काँक्रीटिंग, रस्ता व नाली कामाची चौकशी करण्यात यावी व नगरपरिषद मध्ये लावण्यात आलेल्या सीसीटीव्ही तपासाव्या यामध्ये आर्थिक व्यवहार झाल्याचे नक्कीच आढळून येईल असे तक्रारीत नमूद करण्यात आला. अन्यथा दि. १ जुलै २०२४ पासून जिल्हाधिकारी कार्यालय वाशिम येथे आमरण उपोषणाचा इशारा दिला आहे. या तक्रारीच्या प्रतिलिपी नगर विकास विभाग, मंत्रालय मुंबई,  जिल्हा प्रशासन अधिकारी, जिल्हाधिकारी कार्यालय वाशिम यांना देण्यात आल्या आहेत.

…….

[  स्वतःच टेंडर करून निकटवर्तीयांना कंत्राटे…

वाशिम नगर परिषदेमध्ये गेल्या दोन वर्षांपासून प्रशासक आहे. त्यामुळे नगरपरिषद मुख्याधिकारी व नगर अभियंता यांच्याकडून आपल्या निकटवर्तीय कंत्राटदारांना नगर परिषद निधी मधून स्वतःच टेंडर करून शहरातील रस्त्याच्या कामांचे टेंडर देण्यात येत आहे. या माध्यमातून मोठ्या प्रमाणात टक्केवारी घेतल्याचा आरोप तक्रारीतून करण्यात आला आहे. ]

[ कंत्राटदारांना खुली सूट…

वाशिम नगरपरिषद मुख्याधिकारी व नगर अभियंता अधिकारी यांनी वाशिम शहरातील जनतेच्या पैशाची उधळपट्टी करून आपल्याला टक्केवारी कशी मिळवता येईल याकडे लक्ष देत आहेत. त्यामुळे कुठल्याही तक्रारीची दखल घेत नाहीत व कंत्राटदारांना खुली सूट देण्यात येत असल्याचे तक्रारीत नमूद केले आहे. ]