कोल्हापुर दुर्घटना ट्रक-बोलेरोची जोरदार धडक, एकाच गावातील तीन तरुणांचा जागीच मृत्यू; कोल्हापुरात हळहळ

नयन यादवाड, कोल्हापूर : देवगड कर्नाटकातील निपाणी या राज्य महामार्गावर सरवडे येथे ट्रक आणि बोलेरोची मध्यरात्री धडक झाली. या अपघातात राधानगरी तालुक्यातील सोळंकुर गावातील तीन युवक ठार झाले तर चौघेजण जखमी झाले. यामुळे सोळंकुर गावावर शोककळा पसरली आहे. शुभम चंद्रकांत धावरे, आकाश आनंदा परीट, रोहन संभाजी लोहार अशी मृत तरुणांची नावे आहेत. ऋत्विक राजेंद्र पाटील, सौरभ सुरेश तेली, भरत धनाजी पाटील, संभाजी हणमंत लोहार हे जखमी झाले आहेत

ऐन गणेशोत्सव काळात एकाच गावातील तीन तरुणांचा मृत्यू झाल्याने सोळंकुर गाव शोकसागरात बुडाले आहे. सरवडे मांगेवाडी हद्दीतील सूर्यवंशी मळा येथे हा मध्यरात्री अपघात घडला. सरवडे येथील नदीच्या पश्चिम वळणावर दोन्ही वाहनांची धडक झाली. अपघातानंतर बेदरकारपणे वाहन चालवणारा ट्रक चालक पसार झाला. या प्रकरणी राधानगरी पोलीस ठाण्यामध्ये राजेंद्र मनोहर लोहार यांनी फिर्याद दाखल केली आहे.

पोलिसांकडून मिळालेल्या माहितीनुसार, काल ११ सप्टेंबर रोजी रात्री शुभम धावरे, आकाश परीट, रोहन लोहार, ऋत्विक पाटील, भरत पाटील, सौरभ तेली आणि संभाजी लोहार सर्वजण रा. सोळांकुर हे गारगोटी येथून बोलेरो गाडी क्रमांक (MH 42 H 3064) या चारचाकीतून सोळांकुर येथे येत होते. रात्री १२.३० वाजण्याच्या सुमारास सरवडे येथील नदीच्या पुलाजवळ पश्चिम वळणावर ट्रक क्रमांक (KA 28 AA 8206) ने बोलेरोला अचानक समोरून जोरात धडक दिली. या धडकेत शुभम धावरे, आकाश परीट आणि रोहन लोहार या तिघांचा जागीच मृत्यू झाला तर ऋत्विक पाटील, भरत पाटील, सौरभ तेली आणि संभाजी लोहार हे चौघे गंभीर जखमी झाले.

दरम्यान, अपघातानंतर ट्रक चालक गड्डयाप्पा परशुराम राठोड (वय ४२, रा. यादगीर, कर्नाटक) याने अपघातग्रस्तांना कोणतीही मदत न करता पसार झाला. या घटनेची माहिती मिळताच राधानगरी पोलिसांनी त्वरित घटनास्थळी दाखल होत कारवाई सुरू केली. तर फिर्यादी राजेंद्र मनोहर लोहार (वय ४१, रा. सोळांकुर) यांनी ट्रक चालकाविरोधात फिर्याद दाखल केली आणि पोलिसांनी ट्रक चालकाला अवघ्या काही तासात हुडकून काढत ताब्यात घेतल. ट्रकचालकाविरोधात गुन्हा दाखल करण्यात आला आहे. मात्र ऐन गणेशोत्सव काळात एकाच गावातील तीन तरुणांचा मृत्यू झाल्याने सोळंकुर गाव शोकसागरात बुडाले आहे.