बुलढाण्यात भीषण अपघात, तिघांचा मृत्यू; कारच्या छपराचा पत्रा कापून मृतदेह बाहेर काढले

बुलढाणा :- जिल्हा प्रतिनिधी

बुलढाण्यातील नांदुरा शहरात मंगळवारी पहाटे एक भीषण अपघात झाल्याची माहिती समोर आली आहे. या अपघातामध्ये तिघांचा जागीच मृत्यू झाला असून चार जण जखमी आहेत. जखमींपैकी अनेकांची प्रकृती गंभीर असल्याने मृतांचा आकडा वाढण्याची शक्यता आहे. प्राथमिक माहितीनुसार, बुलढाण्यातील   राष्ट्रीय महामार्ग क्रमांक   सहावर हा अपघात घडला. पहाटे साडेचार वाजता नांदुरा शहराजवळ आर्टिगा कार आणि ट्रकची जोरदार टक्कर झाली. ही टक्कर इतकी जोरदार होती की, कारमधील तिघांचा जागीच मृत्यू झाला.

ट्रकच्या जोरदार धडकेमुळे कारचा पुढील भाग पूर्णपणे चेपला गेला होता. त्यामुळे कारमधील मृतदेह आणि जखमींना बाहेर काढणे अवघड झाले होते. मात्र, नांदुरा   येथील जीवन रक्षक पथकाने दोन तासांची मेहनत करुन गाडीतील जखमी आणि मृतांना बाहेर काढले. भीषण धडकेमुळे कारमधील सर्व प्रवाशी निपचित पडले होते. त्यामुळे जीवन रक्षक पथकाला कारच्या छपराचा पत्र्याचा  भाग कापावा लागला. हा पत्रा कापल्यानंतर जीवन रक्षक पथकाने कारमध्ये उतरुन मृतांना आणि जखमींना बाहेर काढले. जखमींना खामगाव   येथील शासकीय रुग्णालयात उपचारासाठी दाखल करण्यात आले. जखमींपैकी तिघांची प्रकृती चिंताजनक असल्याचे सांगितले जाते. त्यामुळे या अपघातामधील मृतांचा आकडा वाढण्याची शक्यता आहे.