खामगाव कृषी उत्पन्न बाजार समितीत राजकीय भूकंप : अजित पवार गटाला धक्का; काँग्रेसच्या अविश्वास प्रस्तावाला भाजपची साथ

खामगाव :
पश्चिम विदर्भातील सर्वात मोठ्या कृषी उत्पन्न बाजार समितीत (APMC) अजित पवार गटाच्या राष्ट्रवादी काँग्रेसला मोठा धक्का बसला आहे. खामगाव येथील कृषी उत्पन्न बाजार समितीत सत्ताधारी राष्ट्रवादीच्या विरोधात काँग्रेसने अविश्वास प्रस्ताव दाखल केला असून, या प्रस्तावाला भाजपनेही समर्थन दिले आहे.

 18 पैकी 13 सदस्य अज्ञातवासात

खामगाव बाजार समितीत एकूण 18 सदस्य आहेत. त्यापैकी 13 सदस्यांनी काँग्रेस नेते ज्ञानेश्वर पाटील यांच्या नेतृत्वाखाली जिल्हाधिकाऱ्यांना भेट देत अविश्वास प्रस्ताव दाखल केला आहे. त्यानंतर हे सर्व सदस्य अज्ञातवासात गेले असल्याची माहिती समोर आली आहे.

सदस्यांची पक्षनिहाय मांडणी पुढीलप्रमाणे :

• काँग्रेस : 6

• राष्ट्रवादी (शरद पवार गट) : 1

• वंचित बहुजन आघाडी : 3

• भाजप : 1

यामुळे सत्ताधारी अजित पवार गटाच्या राष्ट्रवादी काँग्रेसला मोठा धक्का बसला आहे.

 अजित पवार गटाच्या सत्तेला धोका

सध्या खामगाव कृषी उत्पन्न बाजार समितीवर अजित पवार गटाच्या राष्ट्रवादी काँग्रेसची सत्ता होती. सुभाष पेसोडे हे सभापती असून, स्थानिक नेते दिलीपकुमार सानंदा यांच्या मार्गदर्शनाखाली समितीचा कारभार चालत होता.
मात्र स्थानिक पातळीवरील असंतोष, निर्णयप्रक्रियेतील मतभेद आणि नेतृत्वशैलीबद्दल नाराजी या पार्श्वभूमीवरच हा अविश्वास प्रस्ताव आणण्यात आला असल्याचे सूत्रांचे म्हणणे आहे.

 मतदान 14 नोव्हेंबरला

या अविश्वास प्रस्तावावर १४ नोव्हेंबर रोजी मतदान होणार असून, जर हा प्रस्ताव पारित झाला, तर काँग्रेसच्या पुढाकाराने आणि भाजपच्या पाठिंब्याने समितीवर नव्या सत्तेचा ताबा मिळण्याची शक्यता निर्माण झाली आहे.
त्यामुळे बुलढाणा जिल्ह्यातील राजकीय समीकरणे मोठ्या प्रमाणावर बदलण्याची शक्यता वर्तवली जात आहे.

 खामगावच्या राजकारणात खळबळ

या घडामोडींमुळे खामगाव शहर आणि परिसरातील राजकीय वातावरण चांगलेच तापले आहे. स्थानिक कार्यकर्त्यांमध्ये चर्चा रंगल्या असून, आगामी स्थानिक स्वराज्य निवडणुकांपूर्वी या घटनेचा थेट परिणाम अजित पवार गटाच्या संघटनात्मक ताकदीवर होणार असल्याचे निरीक्षकांचे मत आहे.