चिखली प्रतिनिधी :-
आगामी चिखली नगर परिषद निवडणुकीच्या पार्श्वभूमीवर भारतीय जनता पक्षात आज संघटनात्मक हालचालींना वेग आला. या अनुषंगाने चिखली येथे पक्ष निरीक्षक म्हणून माजी मंत्री डॉ. रणजीत पाटील यांनी कार्यकर्ते व पदाधिकाऱ्यांशी संवाद साधत आगामी निवडणुकीसाठीची दिशा व रणनीती ठरवली.
बैठकीत डॉ. पाटील यांनी स्थानिक कार्यकर्त्यांची मते जाणून घेतली, पक्षाच्या विजयासाठी एकजुटीने काम करण्याचे आवाहन केले आणि “चिखली नगर परिषदेत भगवा फडकवायचा” असा निर्धार व्यक्त केला.
या प्रसंगी भाजपा बुलढाणा जिल्हाध्यक्ष मा. श्री. विजयराज शिंदे, तसेच जिल्ह्यातील वरिष्ठ पदाधिकारी, नगरसेवक, युवा मोर्चा पदाधिकारी आणि कार्यकर्ते मोठ्या संख्येने उपस्थित होते.
बैठकीदरम्यान स्थानिक प्रश्न, विकास आराखडा आणि जनसंपर्क मोहिमेवर सविस्तर चर्चा झाली. “भाजपाच्या विकासाभिमुख कारभारावर जनतेचा विश्वास आहे; चिखली नगर परिषद निवडणुकीतही हा विश्वासच विजयात रूपांतरित होईल,” असा विश्वास पक्ष निरीक्षकांनी व्यक्त केला.
कार्यक्रमाचे आयोजन उत्साहात पार पडले असून, कार्यकर्त्यांमध्ये आत्मविश्वास आणि विजयाचा उत्साह दिसून आला.