मेहकरमध्ये दीड वर्षाच्या बालिकेचा मृत्यू; अंत्यसंस्कारानंतर कुत्र्यांनी मृतदेह उकरल्याने खळबळ

मेहकर शहरात भटक्या समाजातील एका दीड वर्षाच्या चिमुकलीच्या मृत्यूच्या घटनेनंतर आणखी एक हृदयद्रावक प्रकार समोर आला आहे. अंत्यसंस्कारानंतर मोकाट कुत्र्यांनी मृतदेह उकरून काढल्याने शहरात मोठी खळबळ उडाली आहे. पोलिसांनी तपासानंतर हा प्रकार घातपाताचा नसून अंत्यसंस्काराच्या वेळी खड्डा पुरेसा खोल न झाल्यामुळे घडल्याचे स्पष्ट केले आहे.

नेमकं काय घडलं?

मेहकर–जानेफळ रोडवरील पालवात राहणाऱ्या भटक्या कुटुंबातील दीड वर्षाच्या बालिकेची प्रकृती अचानक बिघडली. तिला तातडीने ग्रामीण रुग्णालयात नेण्यात आले. डॉक्टरांनी प्रकृती गंभीर असल्याने पुढील उपचारासाठी हलविण्याचा सल्ला दिला. मात्र रुग्णालयातून हलवित असताना चिमुकलीचा रस्त्यातच मृत्यू झाला.

कुटुंब भटक्या समाजातील असल्याने त्यांनी रात्रीच महानुभाव पंथाच्या स्मशानभूमी जवळच अंत्यसंस्कार केले. परंतु खड्डा पुरेसा खोल न झाल्याने मृतदेह व्यवस्थितपणे न पुरला गेल्याचे तपासात उघड झाले.

रात्री काय घडलं?

रात्रीच्या वेळी मोकाट कुत्र्यांनी हा खड्डा उकरून मृतदेह बाहेर काढला आणि शरीराचे काही भाग फाडून नेले. पहाटे स्थानिकांनी मानवी अवयव दिसताच शहरात एकच खळबळ उडाली. तात्काळ पोलिसांना माहिती देण्यात आली.

पोलीस निरीक्षक व्यंकटेश्वर आलेवार, त्यांचे पथक, श्वान पथक आणि फॉरेन्सिक टीम घटनास्थळी दाखल झाली. तपासानंतर घटना घातपाताची नसून अयोग्य अंत्यसंस्कारामुळे घडलेली दुर्दैवी चूक असल्याचे पोलिसांनी सांगितले.

परिसरात हळहळ; प्रशासनाकडे मदतीची मागणी

या घटनेमुळे परिसरातील नागरिकांत आणि सामाजिक संस्थांमध्ये हळहळ व्यक्त होत आहे. भटक्या कुटुंबांना योग्य मार्गदर्शन, सुरक्षित अंत्यसंस्काराची सुविधा आणि आवश्यक मदत प्रशासनाकडून मिळावी, अशी मागणी करण्यात येत आहे.

असुरक्षित अंत्यसंस्कार व मोकाट प्राण्यांमुळे निर्माण होणारे धोके लक्षात घेता स्थानिक प्रशासनाने तातडीने आवश्यक उपाययोजना करावी, अशी अपेक्षा व्यक्त होत आहे.