मेहकर नगरपालिका निवडणुकीत राष्ट्रवादी काँग्रेस (अजित पवार गट) पूर्ण ताकदीने उतरते — गिरधर पाटील ठाकरे

मेहकर, प्रतिनिधी ;-
मेहकर नगरपरिषद निवडणुकीच्या पार्श्वभूमीवर राष्ट्रवादी काँग्रेस (अजित पवार गट) आता पूर्ण ताकदीने रणसज्ज झाली आहे. महायुतीचा घटक पक्ष असूनही, गरज भासल्यास पक्ष स्वतंत्रपणे निवडणूक लढवेल, अशी स्पष्ट भूमिका पक्षाचे प्रदेश सरचिटणीस गिरधर पाटील ठाकरे यांनी पत्रकार परिषदेत मांडली.
ठाकरे म्हणाले, “यावेळी नगराध्यक्ष पद खुल्या प्रवर्गासाठी आरक्षित असल्याने सर्व पक्ष जोरदार तयारी करत आहेत. आमचा पक्ष युतीमध्ये असेल तर उत्तम, अन्यथा नगराध्यक्षपदासह नगरसेवक पदांवर स्वतंत्र उमेदवार देण्याचा विचार सुरू आहे.”
हा निर्णय ऍड. नाझेर काझी आणि सिंदखेड राजा मतदारसंघाचे आमदार मनोज कायंदे यांच्या मार्गदर्शनाखाली घेतला जाईल, असेही त्यांनी सांगितले.
त्यांनी पुढे म्हटलं की, “मेहकर शहरात राष्ट्रवादी काँग्रेस (अजित पवार गट) चं मजबूत संघटन उभं आहे. आमच्या कार्यकर्त्यांनी नगरपरिषदेच्या माध्यमातून अनेक विकासकामं केली आहेत. त्यामुळे आगामी निवडणुकीत जनता आमच्याबरोबर उभी राहील, असा आम्हाला विश्वास आहे.”
पत्रकार परिषदेला तालुका अध्यक्ष गजानन सावंत, शहराध्यक्ष सुमेर खान, युवक जिल्हा कार्याध्यक्ष रवि मिस्कीन, तसेच अनेक पदाधिकारी आणि कार्यकर्ते उपस्थित होते.