वडगाव तेजन येथे दिमाखदार शिवजयंती उत्सव

वडगाव तेजन प्रतिनिधी :
हिंदवी स्वराज्याचे संस्थापक, पराक्रम, शौर्य आणि स्वाभिमानाचे प्रतीक असलेले छत्रपती शिवाजी महाराज यांच्या जयंतीनिमित्त वडगाव तेजन येथे अभूतपूर्व उत्साहात आणि दिमाखदार वातावरणात शिवजयंती साजरी करण्यात आली.
संपूर्ण गाव भगव्या पताकांनी सजले होते. ‘जय भवानी, जय शिवाजी’च्या घोषणांनी तसेच टाळ-मृदंगाच्या गजराने वातावरण दुमदुमून गेले. सकाळी महाराजांच्या प्रतिमेचे विधिवत पूजन करून कार्यक्रमाची सुरुवात करण्यात आली. ग्रामस्थ, महिला मंडळ, युवक मंडळ तसेच गावातील भजनी मंडळी मोठ्या संख्येने उपस्थित होती.
पूजनानंतर भव्य मिरवणुकीस प्रारंभ करण्यात आला. मिरवणूक गावातील प्रमुख मार्गावरून काढण्यात आली. टाळ, मृदंग, झांज व ढोल यांच्या तालावर भजन आणि घोषणांनी वातावरण भक्तीमय व प्रेरणादायी झाले. युवकांनी शिवकालीन पोशाख परिधान करून शिवचरित्राचे जिवंत दर्शन घडवले, तर लहान मुलांनी हातात फलक घेऊन शिवरायांच्या पराक्रमाच्या घोषणा दिल्या.
ठिकठिकाणी ग्रामस्थांनी पुष्पवृष्टी करून महाराजांना अभिवादन केले. महिलांनी उत्स्फूर्त सहभाग घेत मिरवणुकीत विशेष रंगत आणली. शिवजयंतीनिमित्त गावात सामूहिक भोजन कार्यक्रमाचे आयोजनही करण्यात आले होते.
हा सोहळा यशस्वी करण्यासाठी युवक मंडळ, महिला मंडळ व सर्व ग्रामस्थांनी विशेष परिश्रम घेतले. संपूर्ण गाव शिवमय वातावरणात न्हाऊन निघाले होते.