डोणगाव प्रतिनिधी :
“स्वच्छता हीच पूजा आणि हीच खरी मानवंदना” हा संदेश देणारे थोर समाजसुधारक राष्ट्रसंत गाडगेबाबा यांची जयंती आज स्थानिक शाळेत उत्साहात साजरी करण्यात आली. जयंतीनिमित्त शाळा तसेच सार्वजनिक ठिकाणी स्वच्छता मोहीम राबवून महाराजांना आगळीवेगळी मानवंदना देण्यात आली.
पूजन व अभिवादन
कार्यक्रमाची सुरुवात गाडगेबाबांच्या प्रतिमेचे पूजन करून करण्यात आली. यावेळी मुख्याध्यापक, शिक्षकवृंद आणि विद्यार्थी मोठ्या संख्येने उपस्थित होते. गाडगेबाबांनी आयुष्यभर दिलेला स्वच्छतेचा आणि अज्ञान दूर करण्याचा संदेश पुढे नेण्याचा निर्धार यावेळी व्यक्त करण्यात आला.
स्वच्छता मोहीम आणि श्रमदान
जयंतीनिमित्त शाळा व्यवस्थापन समितीचे अध्यक्ष बालप्रसादजी आखाडे, उपाध्यक्ष राजेश जाधव, रवी वाघटकर तसेच शिक्षक व विद्यार्थ्यांनी एकत्र येत शालेय परिसर आणि लगतच्या बाजार परिसराची स्वच्छता केली. हातात झाडू घेऊन सर्वांनी श्रमदान करत परिसर चकाचक केला.
यानंतर सर्व विद्यार्थी व शिक्षकांनी एकत्रितपणे
“महाराजांचा स्वच्छतेचा वसा आम्ही कायम पुढे नेऊ” अशी प्रतिज्ञा घेतली.
साहित्य वाटप
या निमित्ताने शालेय विद्यार्थ्यांना पेन्सिल व पुस्तके वाटप करण्यात आली. गाडगेबाबांचे विचार केवळ भाषणापुरते मर्यादित न ठेवता ते कृतीत उतरवण्याचा संकल्प यावेळी करण्यात आला.
या उपक्रमामुळे ग्रामस्थांमध्ये स्वच्छतेबाबत जनजागृती निर्माण झाली असून शाळेच्या या पुढाकाराचे सर्वत्र कौतुक होत आहे.+-
Users Today : 45