सिल्लोड | प्रतिनिधी गोकुळसिंग राजपूत
सिल्लोड–सोयगाव विधानसभा मतदारसंघाचे लाडके आमदार तथा राज्याचे मंत्री अब्दुल सत्तार यांच्या पत्नी व सिल्लोड नगर परिषदेच्या माजी नगराध्यक्षा नफीसाबेगम यांचे दुःखद निधन झाल्याची वार्ता समजताच संपूर्ण सिल्लोड शहर व परिसरात हळहळ व्यक्त करण्यात येत आहे. त्यांच्या निधनामुळे सामाजिक, राजकीय व शैक्षणिक क्षेत्रात शोककळा पसरली आहे.
नफीसाबेगम यांनी नगराध्यक्ष म्हणून कार्यरत असताना सिल्लोड शहराच्या विकासासाठी विविध उपक्रम राबवले होते. नागरिकांशी सातत्याने संवाद ठेवत शहरातील मूलभूत सुविधा, स्वच्छता, पाणीपुरवठा आदी प्रश्नांवर त्यांनी सकारात्मक पावले उचलली होती. त्यांच्या कार्यपद्धतीत साधेपणा व लोकाभिमुखता दिसून येत असे. त्यामुळे सर्वसामान्य नागरिकांमध्ये त्यांच्याबद्दल आदराची भावना होती.
या दुःखद प्रसंगी माजी जिल्हा परिषद सदस्य गोपीचंद जाधव यांनी आमदार अब्दुल सत्तार साहेब यांच्या निवासस्थानी जाऊन कुटुंबीयांची सांत्वनपर भेट घेतली. त्यांनी नफीसाबेगम यांना भावपूर्ण श्रद्धांजली अर्पण करून कुटुंबीयांच्या दुःखात सहभागी असल्याचे व्यक्त केले. “नफीसाबेगम यांचे निधन ही केवळ सत्तार कुटुंबाची नव्हे, तर सिल्लोड शहराची मोठी हानी आहे,” असे मत त्यांनी व्यक्त केले.
या वेळी विविध क्षेत्रातील मान्यवर, पदाधिकारी, कार्यकर्ते तसेच नागरिक मोठ्या संख्येने उपस्थित राहून श्रद्धांजली वाहत होते. सर्व स्तरातून नफीसाबेगम यांच्या कार्याचा उल्लेख करत त्यांच्या आत्म्यास शांती लाभो, अशी प्रार्थना करण्यात आली.
नफीसाबेगम यांच्या निधनाने सत्तार कुटुंबीयांवर दुःखाचा डोंगर कोसळला असून परिसरात शोककळा पसरली आहे.
भावपूर्ण श्रद्धांजली.
Users Today : 6