घरगुती उपचारांची शिदोरी : “आजीबाईचा बटवा” सत्रातून आरोग्याचा मंत्र

शेगाव प्रतिनिधी :

संतनगरी Shegaon येथील विसावा मैदानावर Ministry of AYUSH यांच्या वतीने आयोजित चार दिवसीय “राष्ट्रीय आरोग्य मेळावा २०२६” मध्ये “आजीबाईचा बटवा” या विशेष सत्राला बुलढाणा जिल्ह्यातील महिला भगिनींचा उत्स्फूर्त प्रतिसाद लाभला.
घरचा वैद्य : आयुर्वेदिक प्रथमोपचारांचे मार्गदर्शन
“आजीबाईचा बटवा” या उपक्रमांतर्गत घरगुती आयुर्वेदिक प्रथमोपचार, दैनंदिन जीवनातील साधे पण प्रभावी उपचार, तसेच पारंपरिक औषधी वनस्पतींचा वापर याबाबत सविस्तर मार्गदर्शन करण्यात आले.
सत्रादरम्यान सहभागी महिलांना सर्दी-खोकला, पोटदुखी, किरकोळ जखमा, ताप यांसारख्या सामान्य आजारांवर घरच्या घरी करता येणारे सुरक्षित उपाय सांगण्यात आले. आयुर्वेदातील प्रतिबंधात्मक आरोग्य संकल्पना आणि संतुलित जीवनशैलीचे महत्त्वही अधोरेखित करण्यात आले.
संवादातून जागृती
विशेष सत्राला उपस्थित तज्ज्ञांनी महिलांशी थेट संवाद साधत त्यांच्या शंकांचे निरसन केले. पारंपरिक ज्ञान आणि आधुनिक आरोग्य दृष्टिकोन यांची सांगड घालत ‘घरचा वैद्य’ ही संकल्पना बळकट करण्यावर भर देण्यात आला.
या उपक्रमामुळे महिलांमध्ये आरोग्याविषयी जागरूकता वाढीस लागली असून, घरगुती उपचारांची शिदोरी प्रत्येक घरापर्यंत पोहोचवण्याचा संदेश देण्यात आला