वडगाव तेजन, दि. २५ (प्रतिनिधी)
लोणार तालुक्यातील वडगाव तेजन गावाने क्षयरोग निर्मूलनाच्या लढ्यात उल्लेखनीय कामगिरी करत ‘टीबीमुक्त गाव’ हा मानाचा किताब पटकावला आहे. शासनाच्या वतीने देण्यात आलेले हे पारितोषिक गावाचे सरपंच Dr. Vijay Tejankar यांनी स्वीकारले असून या यशामुळे संपूर्ण गावात आनंदाचे वातावरण निर्माण झाले आहे. 🎉
गेल्या काही वर्षांपासून ग्रामपंचायत, आरोग्य विभाग आणि आशा सेविका यांच्या समन्वयातून Tuberculosis प्रतिबंधासाठी प्रभावी उपाययोजना राबविण्यात आल्या. गावातील संभाव्य रुग्णांचा शोध घेणे, वेळेवर तपासणी करून उपचार सुरू करणे आणि उपचार पूर्ण होईपर्यंत सातत्याने पाठपुरावा करणे यावर विशेष भर देण्यात आला.
तसेच ग्रामस्थांमध्ये टीबीबाबत जनजागृती निर्माण करण्यासाठी विविध मोहिमा, आरोग्य शिबिरे आणि मार्गदर्शन सत्रांचे आयोजन करण्यात आले. सरपंच डॉ. विजय तेजनकर यांच्या नेतृत्वाखाली गावात ‘टीबी हद्दपार’ ही संकल्पना प्रभावीपणे राबविण्यात आली.
घराघरांत जाऊन तपासणी करणे, लक्षणे ओळखणे तसेच टीबी रुग्णांबाबत असलेली भीती आणि गैरसमज दूर करण्यासाठी सातत्याने प्रयत्न करण्यात आले. यामुळे रुग्ण पुढे येऊन उपचार घेण्याचे प्रमाण वाढले आणि रोगावर नियंत्रण मिळवणे शक्य झाले.
गावातील नागरिकांनीही या मोहिमेत सक्रिय सहभाग नोंदवला. रुग्णांना योग्य आहार, औषधोपचार आणि मानसिक आधार देण्यात ग्रामस्थांनी मोलाची भूमिका बजावली. त्यामुळे उपचार पूर्णत्वास जाण्याचे प्रमाण वाढले आणि गाव हळूहळू टीबीमुक्त होण्याच्या दिशेने वाटचाल करू लागले.
या पारितोषिकामुळे वडगाव तेजन गावाचा लोणार तालुक्यात आदर्श म्हणून गौरव होत असून इतर गावांसाठीही हे प्रेरणादायी उदाहरण ठरत आहे. भविष्यातही गावात आरोग्याबाबत जागरूकता टिकवून ठेवत टीबीमुक्त स्थिती कायम राखण्यासाठी सातत्याने प्रयत्न सुरू ठेवले जातील, असा विश्वास सरपंच डॉ. विजय तेजनकर यांनी व्यक्त केला.
Users Today : 9