गजानन महाराज संस्थानात प्रभू श्रीराम जन्मोत्सव सोहळा थाटात

धाड  –

चैत्र शुद्ध नवमीच्या शुभमुहूर्तावर देशभरात राम नवमी उत्सव साजरा होत असताना धाड येथील गजानन महाराज संस्थान येथे प्रभू श्रीराम जन्मोत्सव सोहळा अत्यंत भक्तीमय आणि मंगलमय वातावरणात पार पडला. “श्रीराम जय राम जय जय राम” या जयघोषाने संपूर्ण परिसर दुमदुमून गेला. 🙏🚩

या सोहळ्याचे प्रमुख आकर्षण म्हणजे महिला भक्तांनी सजवलेला नयनरम्य पाळणा. विशेष परिश्रम घेऊन फुले आणि वस्त्रांनी सजवलेल्या या पाळण्यात ‘इशांत’ या लहान बालकाला श्रीरामाच्या रूपात बसवण्यात आले होते. धनुष्यबाण धारण केलेल्या या बालरुपी रामाचे दर्शन घेण्यासाठी भाविकांनी मोठी गर्दी केली होती. 👶🌸

दुपारी नेमके १२.३९ वाजता प्रभू श्रीरामांचा जन्मोत्सव मोठ्या उत्साहात साजरा करण्यात आला. यावेळी महिलांनी पारंपरिक पाळणा गीते गाऊन भक्तिमय वातावरण निर्माण केले. टाळ-मृदंगाच्या गजरात आणि फुलांच्या वर्षावात आरती संपन्न झाली. त्यामुळे संस्थान परिसर जणू अयोध्या झाल्याचा अनुभव भाविकांना आला.

या उत्सवाचे आणखी एक वैशिष्ट्य म्हणजे महिला भक्तांनी केलेले शिस्तबद्ध नियोजन. दर्शन रांग तसेच महाप्रसाद वितरण अत्यंत सुव्यवस्थित पद्धतीने पार पडले. आरतीनंतर सर्व भाविकांना महाप्रसादाचे वाटप करण्यात आले. 🍛

लहानग्या इशांतचे रामरूप पाहून भाविकांच्या मनात भक्तीभाव दाटून आला. धाड नगरीत जणू प्रभू श्रीरामच अवतरल्याचा अनुभव आल्याची भावना उपस्थितांनी व्यक्त केली