📰 मलकापुरात झेंडा बदलण्याच्या प्रयत्नावरून तणाव

📍 मलकापूर : प्रतिनिधी (दि. ८ एप्रिल)

डॉ. बाबासाहेब आंबेडकर यांच्या जयंतीनिमित्त शहरात उत्साहाचे वातावरण असतानाच, मलकापूर येथील हमीद चौक परिसरात मध्यरात्री झेंडा बदलण्याच्या प्रयत्नावरून दोन गट आमनेसामने आल्याने तणावाचे वातावरण निर्माण झाले. पोलिसांच्या तत्पर हस्तक्षेपामुळे संभाव्य अनर्थ टळला.

मिळालेल्या माहितीनुसार, हमीद चौकातील नगरपालिका प्रशासनाच्या हायमास्टवरील हिरवा झेंडा काढून त्याठिकाणी निळा झेंडा लावण्याचा प्रयत्न काही तरुणांकडून करण्यात आला. या प्रकाराला स्थानिक मुस्लिम समाजातील काही नागरिकांनी तीव्र आक्षेप घेतला. यानंतर दोन्ही गटांमध्ये वाद वाढत जाऊन घोषणाबाजी सुरू झाली.

घटनास्थळी दोन्ही बाजूंचा जमाव जमा झाल्याने परिसरात तणाव वाढला होता. परिस्थितीचे गांभीर्य ओळखून पोलिसांनी तात्काळ घटनास्थळी धाव घेत हस्तक्षेप केला. पोलिसांनी जमावाला पांगवून परिस्थिती नियंत्रणात आणली.

वरिष्ठ पोलीस अधिकाऱ्यांनी दोन्ही समाजातील प्रमुखांशी संवाद साधत शांतता राखण्याचे आवाहन केले. तसेच, मध्यरात्री उशिरापर्यंत परिसरात पोलिस बंदोबस्त ठेवण्यात आला होता.

दरम्यान, सोशल मीडियाच्या माध्यमातून अफवा पसरविण्याचा धोका लक्षात घेता, नागरिकांनी कोणत्याही प्रकारच्या अपप्रचाराला बळी पडू नये आणि चिथावणीखोर संदेश शेअर करू नयेत, असे आवाहन पोलीस प्रशासनाकडून करण्यात आले आहे.