ज्येष्ठ पार्श्वगायिका आशा भोसले यांच्या प्रकृतीबाबत चिंतेची बातमी समोर आली असून त्यांना दक्षिण मुंबईतील ब्रीच कँडी रुग्णालय येथे उपचारासाठी दाखल करण्यात आले आहे. छातीत संसर्ग आणि तीव्र थकवा यामुळे त्यांना रुग्णालयात दाखल करण्यात आल्याची माहिती त्यांच्या नात झनाई भोसलेने दिली आहे. सध्या त्यांच्यावर उपचार सुरू असून प्रकृती सुधारण्याची अपेक्षा व्यक्त करण्यात आली आहे.
दरम्यान, पंतप्रधान नरेंद्र मोदी यांनीही याबाबत चिंता व्यक्त केली आहे. त्यांनी आपल्या अधिकृत एक्स (ट्विटर) खात्यावर लिहिले की, “आशा भोसलेजी यांना रुग्णालयात दाखल केल्याचं ऐकून मी अत्यंत चिंतेत आहे. त्यांच्या उत्तम आरोग्यासाठी आणि त्या लवकर बऱ्या व्हाव्यात यासाठी प्रार्थना करतो.”
झनाई भोसलेने सोशल मीडियावर पोस्ट करत कुटुंबाच्या गोपनीयतेचा आदर राखण्याचे आवाहन केले आहे. तिने सांगितले की, आशा भोसले यांना छातीत संसर्ग झाल्यामुळे आणि प्रचंड थकवा जाणवल्याने रुग्णालयात दाखल करण्यात आले आहे, मात्र उपचार सुरू असून लवकरच सकारात्मक बातमी मिळेल अशी अपेक्षा आहे.
आशा भोसले या भारतीय संगीतसृष्टीतील एक दिग्गज नाव असून त्या गेली आठ दशकांहून अधिक काळ सक्रिय आहेत. लता मंगेशकर यांच्यानंतर सर्वाधिक प्रभावशाली गायिका म्हणून त्यांचे नाव घेतले जाते. त्यांनी आर. डी. बर्मन, ओ. पी. नय्यर, बप्पी लाहिरी, आणि ए. आर. रेहमान यांसारख्या दिग्गज संगीतकारांसोबत काम करत हजारो गाणी सादर केली आहेत.
२०२३ मध्ये त्यांनी दुबई येथे आपल्या ९०व्या वाढदिवसानिमित्त खास कार्यक्रम सादर करून चाहत्यांना आश्चर्यचकित केले होते. त्यांच्या आरोग्याबाबत सध्या संपूर्ण देशभरातून प्रार्थना व्यक्त केल्या जात आहेत.
Users Today : 21