बुलढाणा –
आंतरराष्ट्रीय स्तरावरील तणाव आणि इंधन दरवाढीच्या पार्श्वभूमीवर बुलढाणा जिल्ह्यातील अनेक पेट्रोल पंपांवर शनिवारी शुकशुकाट पाहायला मिळाला. पेट्रोल आणि डिझेलचा पुरवठा कमी झाल्याच्या चर्चेमुळे वाहनधारकांनी मोठ्या प्रमाणात पेट्रोल पंपांकडे धाव घेतल्याने काही ठिकाणी लांबच लांब रांगा लागल्या, तर काही पंपांवर इंधन संपल्याची परिस्थिती निर्माण झाली.
बुलढाणा शहरातील प्रमुख पेट्रोल पंपांवर दिवसभर वाहनधारकांची गर्दी दिसून आली. विशेषतः चिखली रोड, जळगाव रोड आणि शहरातील मध्यवर्ती भागातील पंपांवर वाहनांच्या रांगा वाढल्या होत्या. काही ठिकाणी पेट्रोल आणि डिझेल मर्यादित प्रमाणात देण्यात येत असल्याची माहिती समोर आली.
मागील काही दिवसांपासून मध्य-पूर्वेतील तणावामुळे इंधन दरवाढ होण्याची शक्यता व्यक्त केली जात आहे. त्यातच पेट्रोल-डिझेल दरात वाढ झाल्यानंतर नागरिकांमध्ये इंधन साठेबाजीची भीती निर्माण झाली आहे. त्यामुळे अनेक वाहनधारकांनी अतिरिक्त इंधन खरेदी करण्यास सुरुवात केली असल्याचे चित्र दिसून आले.
जिल्ह्यात सध्या इंडियन ऑइल, हिंदुस्थान पेट्रोलियम आणि भारत पेट्रोलियम कंपनीचे एकूण १६० हून अधिक पेट्रोल पंप कार्यरत आहेत. प्रशासनाकडून पुरवठा सुरळीत असल्याचा दावा करण्यात येत असला, तरी प्रत्यक्षात काही भागांमध्ये इंधन टंचाईची परिस्थिती निर्माण होत असल्याची चर्चा सुरू आहे.
दरम्यान, प्रशासनाने नागरिकांना अफवांवर विश्वास न ठेवण्याचे आवाहन केले आहे. पेट्रोल आणि डिझेलचा पुरेसा साठा उपलब्ध असून अनावश्यक गर्दी किंवा साठेबाजी करू नये, असेही सांगण्यात आले आहे. मात्र वाढत्या गर्दीमुळे वाहनधारकांना तासन्तास प्रतीक्षा करावी लागत असून सर्वसामान्य नागरिकांमध्ये चिंतेचे वातावरण निर्माण झाले आहे.
Users Today : 32