पुणे : ससून सर्वोपचार रुग्णालयात गेल्या दीड वर्षापासून बंद असलेली ‘हेल्थकेअर मॅनेजमेंट इन्फर्मेशन सिस्टीम’ (एचएमआयएस) आता पुन्हा सुरू होणार आहे. त्यामुळे डॉक्टरांना आणि कर्मचाऱ्यांना रुग्णांची माहिती हाताते न लिहिता ‘एचएमआयएस’ प्रणालीद्वारे ऑनलाइन नोंदविता येणार आहे. यामुळे दीड वर्षानंतर ‘ससून’मधील कारभार पुन्हा ऑनलाइन होणार आहे.राज्यातील सरकारी वैद्यकीय महाविद्यालयांशी संलग्न असलेल्या रुग्णालयांमधील कामकाज पूर्वी ‘एचएमआयएस’ प्रणालीद्वारे चालत होते. मात्र, जुलै २०२२मध्ये अचानक ही प्रणाली बंद करण्याचा निर्णय वैद्यकीय शिक्षण विभागाने घेतला. तेव्हापासून सर्व रुग्णालयांमधील ‘एचएमआयएस’ प्रणाली बंद आहे; परंतु आता दीड वर्षानंतर पुन्हा सर्व रुग्णालयांमध्ये ‘एचएमआयएस’ प्रणाली सुरू करण्याचा निर्णय राज्य सरकारने घेतला आहे. ससून रुग्णालय बी. जे. वैद्यकीय महाविद्यालयाशी संलग्न असल्याने ‘ससून’मधील ‘एचएमआयएस’ प्रणाली सुरू होण्याचा मार्ग मोकळा झाला आहे.
– रुग्णांच्या नोंदी ठेवता येतात.
– तपासणी अहवाल एका क्लिकवर उपलब्ध होतो.
– रुग्णाचा संपूर्ण इतिहास एका क्लिकवर डॉक्टरांना कळतो.
– कमी वेळेत सर्व प्रक्रिया होते.
– डॉक्टरांना कागदावर लिहिण्याची गरज पडत नाही.
राज्यातील सर्व सरकारी वैद्यकीय महाविद्यालयांमध्ये पुन्हा ‘एचएमआयएस’ प्रणाली सुरू करण्यात येणार आहे. याबाबतचे काम अंतिम टप्प्यात असून, या महिन्याच्या शेवटपर्यंत ही प्रणाली सुरू करण्यासाठी प्रयत्न सुरू आहे. नवीन प्रणाली पूर्वीच्या तुलनेत अद्ययावत करण्यात आली आहे.- दिनेश वाघमारे, सचिव, वैद्यकीय शिक्षण विभाग
Users Today : 18