मौनी रॉय आणि दिशा पटाणीच्या नात्याच्या चर्चांना उधाण; व्हायरल पोस्टमागील सत्य समोर

मुंबई :

अभिनेत्री Mouni Roy आणि तिचे पती Suraj Nambiar यांच्या विभक्त होण्याच्या चर्चांदरम्यान सोशल मीडियावर आणखी एक पोस्ट मोठ्या प्रमाणात व्हायरल होत आहे. या पोस्टमध्ये मौनी रॉय आणि अभिनेत्री Disha Patani रिलेशनशिपमध्ये असून लग्न करणार असल्याचा दावा करण्यात आला आहे. मात्र या दाव्यामागे कोणतेही अधिकृत सत्य नसल्याचे स्पष्ट झाले आहे.

मौनी रॉय आणि सूरज नांबियार यांनी परस्पर संमतीने वेगळे होण्याचा निर्णय घेतल्याच्या चर्चेनंतर सोशल मीडियावर विविध प्रकारच्या अफवा पसरू लागल्या. दोघांनी एकमेकांना सोशल मीडियावर अनफॉलो केल्याचेही नेटकऱ्यांच्या लक्षात आले. याचदरम्यान दिशा पटाणीनेही सूरज नांबियारला अनफॉलो केल्याची चर्चा रंगली आणि सोशल मीडियावर अनेकांनी विविध तर्कवितर्क लावण्यास सुरुवात केली.

व्हायरल पोस्टमध्ये नेमके काय?

सोशल मीडियावर व्हायरल होत असलेल्या पोस्टमध्ये मौनी रॉय आणि दिशा पटाणी यांच्या गळ्यात हार घातलेल्या फोटोसोबत एक भावनिक मजकूर जोडण्यात आला आहे. त्या पोस्टमध्ये दोघी प्रेमसंबंधात असून लग्न करण्याचा निर्णय घेतल्याचा दावा करण्यात आला आहे. त्यामुळे सोशल मीडियावर चर्चांना अधिक उधाण आले.

फोटो जुना; पोस्ट एडिट केल्याचा दावा

मात्र, या व्हायरल पोस्टमागे कोणतेही अधिकृत सत्य नसल्याचे समोर आले आहे. संबंधित फोटो हा जून २०२५ मधील असून दिशा पटाणीच्या वाढदिवसानिमित्त दोघी इस्कॉन मंदिरात गेल्या होत्या, तेव्हाचा असल्याचे सांगितले जात आहे. फोटोवरील मजकूर आणि कॅप्शन एडिट करून खोटी पोस्ट तयार करण्यात आल्याचा दावा करण्यात आला आहे.

दरम्यान, मौनी रॉयने सोशल मीडियावरून तिच्या वैयक्तिक आयुष्याबद्दल खोट्या अफवा पसरवू नयेत आणि कुटुंबाच्या गोपनीयतेचा आदर राखावा, असे आवाहन चाहत्यांना केले आहे.

या प्रकरणामुळे सोशल मीडियावर व्हायरल होणाऱ्या माहितीची सत्यता तपासण्याची गरज पुन्हा अधोरेखित झाली आहे.