पुणे :
पुणे पोलीस दलाला हादरवून सोडणाऱ्या खंडणी प्रकरणात मोठी कारवाई करण्यात आली असून बडतर्फ पोलीस उपनिरीक्षक अजित बडे आणि पोलीस शिपाई सुदाम तायडे यांना पोलिसांनी अटक केली आहे. मात्र या प्रकरणातील आणखी एक आरोपी असलेली महिला पोलीस Sonali Hinge अद्याप फरार असून तिचा शोध सुरू असल्याची माहिती समोर आली आहे.
या प्रकरणाचा उलगडा झाल्यानंतर संबंधित तिन्ही पोलिस कर्मचाऱ्यांना सेवेतून बडतर्फ करण्यात आले होते. पोलिस दलातील काही कर्मचाऱ्यांच्या कथित गैरप्रकारांमुळे पुणे पोलिसांच्या प्रतिमेला धक्का बसल्याची चर्चा शहरात सुरू आहे.
मिळालेल्या माहितीनुसार, सोशल मीडियावर सक्रिय असलेली आणि रील्समुळे चर्चेत असलेली सोनाली हिंगे ही कारवाईनंतर फरार झाली आहे. ती सतत ठिकाण बदलत असल्याने पोलिसांसमोर आव्हान निर्माण झाले असून विविध पथके तिचा शोध घेत आहेत.
दरम्यान, या घटनेनंतर नागरिकांमधून संताप व्यक्त केला जात आहे. सोशल मीडियावर अनेकांनी पोलिसांनी गुन्हेगारांवर जशी कठोर कारवाई दाखवली जाते, तशीच कारवाई दलातील आरोपींवरही पारदर्शकपणे करावी, अशी मागणी केली आहे.
या प्रकरणामुळे पोलिस दलातील अंतर्गत शिस्त, पारदर्शकता आणि जबाबदारी यावर पुन्हा प्रश्न उपस्थित होत असून वरिष्ठ अधिकारी संपूर्ण प्रकरणाचा सखोल तपास करत आहेत. आरोपींविरोधातील पुरावे, आर्थिक व्यवहार आणि संबंधित नेटवर्कचीही चौकशी सुरू असल्याचे सांगण्यात येत आहे.
Users Today : 38