एकनाथ शिंदेंची पक्षनेतेपदी निवड कशी झाली? सुनावणीदरम्यान खासदार शेवाळेंची महत्त्वाची माहिती

विधानसभाध्यक्ष राहुल नार्वेकर यांच्यासमक्ष शिवसेना आमदारांच्या अपात्रतेबाबत नागपुरात सुनावणी सुरू आहे. शनिवारी खासदार शेवाळे यांची साक्ष नोंदवण्यात आली. ठाकरे गटाचे वकील देवदत्त कामत यांनी शेवाळे यांच्यावर प्रश्नांची सरबत्ती केली. यावर शिंदे गटाचे वकील अनिल साखरे यांनी आक्षेप घेतला. त्यामुळे उभय पक्षांत शाब्दिक चकमक झाल्याचे समजते. सुमारे चार तास सुनावणी चालल्याची माहिती आहे. शिवसेना खासदारांची २५ जून, २०२२पूर्वी बैठक झाली. त्यात पुन्हा राष्ट्रीय लोकशाही आघाडीसोबत (एनडीए) जाण्याचा निर्णय त्यांनी घेतला. गेल्या निवडणुकीत मोठ्या प्रमाणात खासदार निवडून आल्याने त्यांच्यासोबत निवडणूक सोबत लढवावी. उद्धव ठाकरे यांना सदस्यांच्या भावना पोहोचवल्या असता त्यांनी ‘कळवतो’ असे सांगितले, असा दावा खासदार राहुल शेवाळे यांनी केला.येत्या मंगळवारपर्यंत उलटतपासणी पूर्ण करा, असे निर्देश अध्यक्ष राहुल नार्वेकर यांनी दिले. १८ तारखेपासून युक्तिवाद सुरू होऊन २३-२३ तारखेपर्यंत ही प्रक्रिया पूर्ण होण्याची शक्यता आहे. उलटतपासणी अद्याप सुरू असल्याने यावर अधिक बोलणे योग्य होणार नाही, असे खासदार राहुल शेवाळे यांनी ‘मटा’शी बोलताना सांगितले. त्यांची परत उलटतपासणी होणार असून दीपक केसरकर आणि उदय सामंत यांचीही उलटतपासणी होणार आहे.आघाडीसोबत जाण्यास विरोध

पंतप्रधान नरेंद्र मोदी यांच्या नेतृत्वात झालेला विकास आणि त्यांच्या चेहऱ्यांमुळे पक्षाच्या उमेदवाराला भरघोस मते मिळाली. ‘दुकान बंद करेन पण काँग्रेससोबत जाणार नाही’, असे शिवसेनाप्रमुख बाळासाहेब ठाकरे म्हणायचे. त्यामुळे काँग्रेस वा महाविकास आघाडीसोबत जाण्यास विरोध असल्याचे उद्धव ठाकरे यांना कळवले होते, असे शेवाळे म्हणाले. त्यावर ‘लेखी कळवले का’, असा सवाल कामत यांनी केला, यावर शेवाळे यांनी ‘नाही’, असे उत्तर देत मौखिक सांगितल्याचे स्पष्ट केले.