वसतिगृह की कोंडमारा? क्रीडा संकुलातील वसतिगृहांची भयंकर अवस्था, विद्यार्थ्यांना येथे राहण्याची शिक्षा

छत्रपती संभाजीनगर : विभागीय क्रीडा संकुलातील वसतिगृहांची स्थिती अत्यंत दयनीय झाली असून, पाण्यापासून स्वच्छतागृहांपर्यंत आणि राहण्याच्या खोल्यांपासून किमान सोयी-सुविधांपर्यंत सगळ्याच पातळ्यांवर भयंकर स्थिती असल्याचे वारंवार समोर येत आहे. त्यामुळे हे वसतिगृह आहे की खेळाडू विद्यार्थ्यांचा कोंडवाडा आणि अशा वसतिगृहात विद्यार्थी कसे राहू शकतात, असा प्रश्न उपस्थित होत आहे. राज्यस्तरीय बेसबॉल स्पर्धेच्या प्रशिक्षणासाठी राज्यभरातून नुकत्याच आलेल्या विद्यार्थ्यांमुळे हा प्रकार पुन्हा एकदा प्रकर्षाने समोर आला आहे.

मुलींसाठीही स्वतंत्र वसतिगृह

वेगवेगळ्या पातळ्यांवरील स्पर्धा; तसेच प्रशिक्षणासाठी राज्यभरातून येणाऱ्या खेळाडू विद्यार्थ्यांसाठी विभागीय क्रीडा संकुलात वसतिगृहांची सोय करण्यात आली आहे. या ठिकाणी मुलांप्रमाणेच मुलींसाठीही स्वतंत्र वसतिगृह आहे. अर्थात, आज ज्या काही अवस्थेत ही वसतिगृहे आहेत, त्यांना वसतिगृह म्हणायचे का, हाच प्रश्न सर्वांत आधी उभा राहू शकतो, अशी स्थिती आहे. राज्यभरातून येणाऱ्या खेळाडू विद्यार्थ्यांना किमान सोयी-सुविधाही मिळू नयेत; किंबहुना असे खेळाडू विद्यार्थी वसतिगृहात येऊन आजारीच पडावेत, हा तर उद्देश नाही ना, अशी शंका यावी, असेच काहीसे चित्र वसतिगृहांचे आहे.- अनेकदा पाणी नसते

वसतिगृहामध्ये अनेकदा पाणी नसतेच, अशी सार्वत्रिक तक्रार विद्यार्थ्यांकडून होत असतानाच, स्वच्छतागृहांची अवस्था शब्दश: भयंकर अशी झाली आहे. शौचालयात घाण आहे, का घाणीत शौचालय आहे, अशी त्यांची अवस्था आहे. शौचालयाचे भांडे, बेसिनची किती तरी ठिकाणी मोडतोड झाल्याचे पाहायला मिळत आहे. या ठिकाणी कधी स्वच्छता झाली होती का, असाही प्रश्न बघणाऱ्यांना पडल्याशिवाय राहणार नाही, अशी एकंदर स्थिती या स्वच्छतागृहांची आहे. मुळात या वसतिगृहांकडे कुणाचेही लक्ष नसते, अशी सार्वत्रिक तक्रार आहे आणि त्यामुळेच ही बकाल अवस्था निर्माण झाल्याचा आरोप होत आहे.

– विद्यार्थ्यांकडून टाळाटाळ

वसतिगृहाच्या अशा अवस्थेमुळेच अनेक विद्यार्थी या ठिकाणी राहण्याचे टाळतात; परंतु सामान्य विद्यार्थ्यांना पर्याय राहात नाही आणि अशा विद्यार्थ्यांना वसतिगृहाची शिक्षा भोगावी लागत आहे. आणखी महत्त्वाचे म्हणजे मुलांच्या वसतिगृहाची स्थिती भयाण आहेच; शिवाय मुलींच्या वसतिगृहाची स्थितीही कमी-अधिक प्रमाणात अशीच असल्याचे सांगण्यात आले.ढाप्यांमुळे अनेक खेळाडू जखमी

क्रीडा संकुल परिसरात असलेल्या उघड्या ढाप्यामध्ये पडून अनेक खेळाडू जखमी झाले आहेत. काही खेळाडूंना टाके घालण्याची वेळ आल्याचेही समजते. अलीकडेच एक ११ ते १२ वर्षांचा खेळाडू विद्यार्थी याच ढाप्यात पडून त्याच्या गुडघ्याला गंभीर दुखापत झाली. तो पुन्हा खेळू शकेल की नाही, अशी शंका त्याला लागलेल्या जबर मारामुळे घेतली जात आहे. त्यापूर्वी एक खेळाडू मुलगीदेखील याच ढाप्यांमध्ये पडून जबर जखमी झाली होती व तिच्यावरही टाके घालण्याची वेळ आल्याचे समजते. या गंभीर दुखापतीच्या घटना होऊन गेल्यानंतर ढापे बसवण्यास मुहूर्त लागला, असेही सूत्रांनी सांगितले.नवीन इमारत कुलूपबंद

विभागीय क्रीडा संकुलात नवीन व सुस्थितीतील वसतिगृह बांधून तयार आहे; परंतु चार वर्षांपासून वसतिगृहाची नवीन इमारत कुलूपबंद अवस्थेत पडून आहे. नवीन वसतिगृह खुले का करण्यात येत नाही, असाही प्रश्न या निमित्ताने उपस्थित केला जात आहे.

भीतीमुळे तक्रार देण्यास टाळाटाळ

वसतिगृहाच्या बकाल अवस्थेमुळे विद्यार्थी त्रस्त झाले आहेत. मात्र, याबाबत तक्रार देण्यास विद्यार्थी; तसेच पालक धजावत नसल्याचे दिसत आहे. केवळ विद्यार्थ्याचे वैयक्तिक नुकसान होऊ नये, या भीतीतून तक्रार देण्यास टाळाटाळ केली जात असली, तरी त्याचा गैरफायदा पुरेपूर घेतला जात असल्याचे समोर येत आहे.

कोणतीही मुले किंवा मोठी माणसे राहू शकणार नाहीत, अशी वसतिगृहांची भयंकर स्थिती झाली आहे, ती केवळ दुर्लक्षामुळेच. अधिकारी-कर्मचाऱ्यांचे अजिबात लक्ष नसल्यानेच हा गलथान कारभार सुरू आहे. या वसतिगृहात मुला-मुलींना किमान सोयीसुविधाही मिळू नयेत, यापेक्षा आणखी काय भयंकर शिक्षा असू शकते?- सिद्धार्थ पाटील, राज्य सहसचिव, बॅडमिंटन असोसिएशन

वसतिगृहांची नियमित स्वच्छता होते. काही बाबतीत दुरुस्ती होणे बाकी असली, तरी लवकरच ही दुरुस्ती पूर्ण होईल. त्यासाठी निधीचा प्रश्न नसून, येत्या आठ दिवसांत हा प्रश्न मार्गी लागेल.- संजय सबनीस, उपसंचालक, विभागीय क्रीडा संकुल