📰 "आया सावन झुमके" : घरकाम करणाऱ्या महिलांसाठी अनोखा फॅशन शो

📰 “आया सावन झुमके” : घरकाम करणाऱ्या महिलांसाठी अनोखा फॅशन शो

Last updated: 2025/08/19 at 9:08 PM

1 Min Read

📰 “आया सावन झुमके” : घरकाम करणाऱ्या महिलांसाठी अनोखा फॅशन शो

खेडूला (१७ ऑगस्ट) – मोरया फाउंडेशन तर्फे “आया सावन झुमके” या आगळ्या-वेगळ्या कार्यक्रमाचे आयोजन खेडूला कुणबी समाज भवन येथे करण्यात आले. विशेष म्हणजे, या कार्यक्रमात घरकाम करणाऱ्या महिलांसाठी खास फॅशन शो सादर करण्यात आला, ज्यामुळे या महिलांना आत्मविश्वासाने समाजासमोर येण्याची नवी संधी मिळाली.

कार्यक्रमाची संकल्पना फाउंडेशनच्या संस्थापिका सौ. रजनी अविनाश चौहान यांनी मांडली होती. शोचा शुभारंभ पोलीस निरीक्षक कविता इसारकर यांच्या हस्ते दीपप्रज्वलनाने झाला. त्यानंतर दादू या मतिमंद विद्यार्थ्याने तबला वादन करून सगळ्यांची मने जिंकली, तर कार्तिकेय ठाकरे याच्या एकपात्री नाटकाने उपस्थितांना भक्तिरसात भिजवले.

या फॅशन शो मुळे घरकाम करणाऱ्या महिलांचे योगदान समाजासमोर येते आणि त्यांना सन्मानाने वागवण्याची प्रेरणा मिळते, असे विशेष अतिथी कविता इसारकर यांनी मत व्यक्त केले.

शो दरम्यान महिलांच्या कलागुणांचे प्रदर्शन करणारे विविध सांस्कृतिक कार्यक्रमही सादर करण्यात आले. स्पर्धेत विजेत्यांना नऊवार साडी आणि पैठणी साडी भेट देण्यात आली. परीक्षक म्हणून नृत्यगुरु श्री. विशाल चहांदे व सौ. अश्विनी झवर यांनी काम पाहिले.

कार्यक्रमाचे सूत्रसंचालन कु. ओंकारी भूगावकर यांनी केले तर आभार प्रदर्शन सौ. रजनी चौहान यांनी केले.
कार्यक्रमाच्या यशस्वीतेसाठी सौ. माधुरी इत्तडवार, सौ. निशिगंधा रामटेके, सौ. संध्या काटमुसारे, सौ. मनीषा भोयर, सौ. सुवर्णा रहाटे, सौ. सायली आदींनी महत्त्वाचे सहकार्य केले.